అర్థరాత్రి వేళ ఈటెలకు ట్వీట్ చేస్తే.. అలా జరిగిందట!!

కీలకమైన స్థానాల్లో ఉన్న వారికి స్పందించే గుణం ఉంటే.. ప్రజలకు జరిగే మేలు ఎంతో. అయితే.. ఆ లక్షణం కొరవడటం ఇప్పుడు ఎదుర్కొంటున్న పెద్ద సమస్యగా చెప్పక తప్పదు. సోషల్ మీడియా పుణ్యమా అని ప్రముఖులకు ఎవరికైనా తమ గోడును వెల్లబోసుకునే అవకాశం ఉంది. కొందరు చూసిచూడనట్లుగా వదిలేస్తే.. మరికొందరు మాత్రం యుద్ధ ప్రాతిపదికన స్పందించే గుణం ఉంటుంది.

తాజాగా తెలంగాణ రాష్ట్ర మంత్రి ఈటెల రాజేందర్ కు ఒక వ్యక్తి అర్థరాత్రి వేళ లో ట్వీట్ చేశారు. హైదరాబాద్ లోని యూసఫ్ గూడకు చెందిన యువకుడు ఒకరు కరోనా బారిన పడ్డాడు. అర్థరాత్రి వేళ శ్వాస తీసుకోవటంలో తెగ ఇబ్బంది కి గురయ్యాడు. ఆ టైంలో ఏం చేయాలో పాలుపోని ఆ వ్యక్తి మంత్రి ఈటెల రాజేందర్ ట్విట్టర్ ఖాతా కు తాను ఎదుర్కొంటున్న సమస్య ను చెబుతూ ట్వీట్ చేశారు.

అర్థరాత్రి వేళ పోస్టు అయిన ట్వీట్ కు ఈటెల సిబ్బంది రియాక్ట్ అయ్యారు. వెంటనే తమకు అందిన సమాచారాన్ని సంబంధిత పోలీస్ స్టేషన్ కు ఇచ్చారు. వెంటనే స్పందించిన పోలీసులు బాధితుడి నివాసాన్ని గుర్తించి.. అంబులెన్సు లో యుద్ధ ప్రాతి పదికన గాంధీ కి తరలించారు. అర్థరాత్రి వేళ లో చేసిన ట్వీట్ కు వెను వెంటనే స్పందించిన కారణం గా బాధితుడి ప్రాణాల్ని కాపాడారంటూ ఈటెల ను అభినందిస్తున్నారు. ఈ ఉదంతం గురించి తెలసుకున్న సినీ దర్శకుడు హరీశ్ శంకర్ ఈటెలకు హ్యాట్సాఫ్ ఈటెల అంటూ పేర్కొన్నారు.