మోడీ చెవిలో ములాయం ఏం చెప్పాడంటే...

ఉత్త‌ర్‌ ప్ర‌దేశ్ రాజ‌కీయాల్లో స‌త్తా చాటి కుటుంబ క‌ల‌హాల కార‌ణంగా కుదేలైపోయినప్ప‌టికీ..స‌మాజ్‌ వాదీ పార్టీ నేత‌లు త‌మ ర‌క్త‌సంబంధికుల‌పై ప్రేమ‌ను చాటుకుంటూనే ఉన్న‌ట్లుగా క‌నిపిస్తోంది. యూపీ ఎన్నిక‌ల స‌మ‌యంలో తండ్రి ములాయంసింగ్ యాద‌వ్‌ వ‌ర్సెస్ త‌న‌యుడు అఖిలేష్ యాద‌వ్‌ - బాబాయ్ శివ‌పాల్ వ‌ర్సెస్ అబ్బాయ్ అఖిలేష్ అన్న‌ట్లుగా సాగిన ఆరోప‌ణ‌ల కార‌ణంగా ప‌రువు గంగ‌పాలు అయి పార్టీ ఓడిపోయిన సంగ‌తి తెలిసిందే. అనంత‌రం యూపీ సీఎంగా యోగి ఆదిత్య‌నాథ్ ప్ర‌మాణ స్వీకారం చేస్తున్న స‌మ‌యంలో ఓ అరుదైన దృశ్యం క‌నిపించింది. అదే ప్ర‌ధాన‌మంత్రి న‌రేంద్ర‌మోడీతో ఎస్పీ వ్య‌వ‌స్థాప‌కుడు ములాయం చెవిలో గుస‌గుస‌లాడ‌టం. ఈ ఇద్ద‌రు నేత‌లు ఏం మాట్లాడుకొని ఉంటార‌నే సందేహం అంద‌రిలోనూ నెల‌కొంది. దినిపై ఎవ‌రికి తోచిన విశ్లేష‌ణ‌లు వారు చేసుకున్నారు.

ఇలా స‌ర్వ‌త్రా చ‌ర్చనీయాంశంగా మారిన మోడీ-ములాయం గుస‌గుస గుట్టును తాజాగా యూపీ మాజీ సీఎం అఖిలేష్ యాద‌వ్ బ‌య‌ట‌పెట్టాడు. ఓ టీవీ ఛాన‌ల్ ఇంట‌ర్వ్యూలో అఖిలేష్ సింగ్ యాద‌వ్ మాట్లాడుతూ త‌న సంక్షేమం గురించే ప్ర‌ధాని మోడీజీతో నేతాజీ(ములాయంసింగ్ యాద‌వ్‌) చెప్పార‌ని అఖిలేష్ తెలిపారు. `అఖిలేష్ నా కుమారుడు... కాస్త చూసుకోండి` అనే మాట‌ను మోడీ చెవిలో త‌న తండ్రి చెప్పార‌ని అఖిలేష్ వివ‌రించారు. ఎవరు న‌మ్మినా న‌మ్మ‌క‌పోయినా ఈ విష‌యం నిజ‌మ‌ని ధీమా వ్య‌క్తం చేశారు. కాగా అనంత‌రం రాజ‌కీయాల గురించి మాట్లాడుతూ యూపీలో బీజేపీ త‌ప్పుడు ప్ర‌చారం వ‌ల్లే తాము ఓడిపోయామ‌ని ఆరోపించారు. భవిష్య‌త్తులో త‌మ గెలుపు ఖాయ‌మ‌ని ధీమా వ్య‌క్తం చేశారు.

Like Us on Facebook : https://www.facebook.com/Tupakidotcom/