పొలిటికల్ ఎంట్రీపై అలీ క్లారిటీ ఇచ్చేశాడు

ప్రముఖ హాస్యనటుడు అలీ ఆసక్తికర వ్యాఖ్యలు చేశారు. వేదిక ఏదైనా జోకులు పేలుస్తూ ఉండే ఆయన తాజాగా మాత్రం సీరియస్ అంశాన్ని వెల్లడించారు. తాను త్వరలో పొలిటికల్ ఎంట్రీ ఇవ్వనున్నట్లు స్పష్టం చేశారు. రాజకీయ రంగ ప్రవేశంపై ఇప్పుడే నిర్ణయం తీసుకోలేదు కానీ.. 2019లో మాత్రం తాను రాజకీయాల్లోకి రావటం పక్కా అని తేల్చేశారు.

రాజమండ్రిలో జరిగే భారీ బహిరంగ సభలో తన రాజకీయ ఎంట్రీకి సంబంధించిన వివరాలు ప్రకటించనున్నట్లు చెప్పారు. తన రాజకీయ రంగ ప్రవేశం గురించి చెప్పిన అలీ.. పవన్ పాలిటిక్స్ గురించి మాట్లాడటం విశేషం. ప్రస్తుతం పవన్ మూడు సినిమాలు చేస్తున్నారని.. ఆ మూడు సినిమాలు పూర్తి అయిన వెంటనే ఆయన పూర్తిస్థాయి రాజకీయాల్లో దిగనున్నట్లు స్పష్టం చేశారు. అంటే.. అలీ ఎంట్రీ ఇచ్చేది పవన్ పార్టీలోనా అన్నది ఒక ప్రశ్న అయితే.. ప్రత్యేక హోదా అంశంపైనా స్పందించిన అలీ.. ఈ అంశంపై సున్నితంగా పోరాడి సాధించుకోవాలన్న అభిప్రాయం వ్యక్తం చేశారు. మొత్తానికి ఈ కమేడియన్ పొలిటికల్ కెరీర్ ఎంత సీరియస్ గా సాగుతుందో చూడాలి.