మా ఆయన కోసం బన్నీ - వరుణ్‌ వస్తారు - పద్మజ

నరసాపురం ఎంపీ అభ్యర్థిగా జనసేన నుంచి పోటీకి దిగారు నాగబాబు. పవన్‌ కల్యాణ్‌ సోదరుడిగా మాత్రమే కాకుండా మెగాఫ్యామిలీకీ అన్నీ తానై ఇన్నాళ్లు దగ్గరుండి నడపించిన వ్యక్తి నాగబాబు. పైకి మెగాస్టార్‌ పెద్దగా కన్పించినా.. లోలోపల వ్యవహారాలు మొత్తం నడిపించేది నాగబాబే. అలాంటి నాగబాబు తొలిసారి ఎన్నికల్లో పోటీ చేస్తున్నారు. కానీ ఆయన పోటీపై మెగాఫ్యామిలీలో ఎవ్వరికీ పెద్దగా ఆసక్తి లేనట్లుంది. అందుకే.. చాలామంది స్టార్‌ హీరోలున్నా.. ఎవ్వరూ నాగబాబు కోసం ప్రచారానికి రాలేదు. దీంతో.. నాగబాబు - ఆయన భార్య పద్మజ - కూతురు నిహారిక మాత్రమే ప్రచారం చేసుకుంటున్నారు. అల్లు అర్జున్‌ - రామ్‌ చరణ్‌ రాలేదు అంటే అర్థం ఉంది కానీ కన్నకొడుకు వరుణ్‌ తేజ్‌ కూడా ప్రచారానికి డుమ్మాకొట్టాడు.

మెగాహీరోలు నాగబాబు కోసం ప్రచారానికి రావడం లేదని గత రెండు రోజులుగా సోషల్‌ మీడియాలో కథనాలు వస్తూనే ఉన్నాయి. దీనిపై.. నాగబాబు సతీమణి పద్మజ ఓ ఛానెల్‌ కు ఇచ్చిన ఇంటర్వ్యూలో స్పందించారు. ప్రస్తుతం మెగా హీరోలంతా తమ తమ సినిమాల్లో బిజీగా ఉన్నారని చెప్పారు. అల్లు అర్జున్‌ త్వరలోనే ప్రచారం కోసం రాబోతున్నట్లు చెప్పారు. అలాగే వరుణ్‌ తేజ్‌ ప్రస్తుతం విదేశాల్లో ఉన్నాడని.. రేపటిలోకి ఇండియాకు వచ్చి డైరెక్ట్‌ గా నరసాపురం రాబోతున్నట్లు చెప్పారు.

మరోవైపు నాగబాబు కోసం కొంతమంది జబర్దస్త్‌ ఆర్టిస్టులు కూడా నరసాపురంలో మకాం వేసి మరీ ప్రచారం చేస్తున్నారు. అయితే జబర్దస్త్‌ ఆర్టిస్తులు ఎంతమంది వచ్చినా మెగాహీరోలు లేని లోటు మాత్రం స్పష్టంగా కన్పిస్తుంది. అయితే.. రేపటిలోగా బన్నీ - వరుణ్‌ ప్రచారానికి వస్తారంటున్న పద్మజ.. నాగబాబు మంచితనమే ఆయన్ని గెలిపిస్తుందని అన్నారు. నాగబాబుకు సాయం చేసే గుణం చాలా ఎక్కువని - ఎవరికి ఏదైనా వెంటనే స్పందిస్తారని చెప్పారు.