మేనమామకు సపోర్ట్ చేసిన పక్కరోజే జగన్ అభ్యర్థికి మద్దతు

చిన్న మేనమామ నాగబాబుకు తన మద్దతును ప్రకటించిన బన్నీ తాజాగా చేసిన ట్వీట్ ఒకటి సంచలనంగా మారింది. తన మరో మేనమామ చీఫ్ అయిన జనసేన పార్టీ తరఫున నరసాపురం ఎంపీ స్థానానికి పోటీ చేస్తున్న నాగబాబుకు తన సంపూర్ణ మద్దతు ప్రకటించిన బన్నీ.. ఊహించని రీతిలో చేసిన ట్వీట్ ఇప్పుడు రాజకీయ.. చిత్ర పరిశ్రమలో హాట్ టాపిక్ గా మారింది.

నాగబాబుకు తన మద్దతు ప్రకటించిన ఒక్క రోజు వ్యవధిలోనే వైఎస్సార్ కాంగ్రెస్ పార్టీ బరిలో నిలిచిన శిల్పా రవిరెడ్డికి తన సంపూర్ణ మద్దతు ప్రకటించిన బన్నీ పలువురిని ఆశ్చర్యానికి గురి చేశారు. నాకు అత్యంత ఆత్మీయ స్నేహితుడు శిల్ప రవిరెడ్డి తన రాజకీయ ఇన్నింగ్స్ ను ప్రారంభిస్తున్న వేళ.. అతడికి నా కంగ్రాట్స్ అని పేర్కొన్నారు.

కర్నూలు జిల్లా నంద్యాల అసెంబ్లీ ఎన్నికల బరిలో వైఎస్సార్ కాంగ్రెస్ పార్టీ తరఫున పోటీ చేస్తున్న శిల్పా రవి రెడ్డి కి కంగ్రాట్స్ చెప్పటం ద్వారా బన్నీ ఎలాంటి సందేశాన్ని ఇచ్చారన్న దానిపై ఆసక్తికర చర్చ నడుస్తోంది. ఓపక్క జనసేన అభ్యర్థి నంద్యాల బరిలో ఉన్న వేళ.. పవన్ ఏ మాత్రం ఇష్టపడని వైఎస్సార్ కాంగ్రెస్ పార్టీ అభ్యర్థికి బన్నీ ఎలా సపోర్ట్ చేస్తారన్నది ప్రశ్నగా మారింది.

శిల్పా రవిరెడ్డి బన్నీకి అత్యంత ఆఫ్తుడు కావొచ్చు. అంత మాత్రాన ఆయనకు బహిరంగంగా సోషల్ మీడియాలో కంగ్రాట్స్ చెప్పటం.. ఇప్పుడు చర్చగా మారింది. బన్నీ ట్వీట్ పుణ్యమా అని సోషల్ మీడియాలో వైఎస్సార్ కాంగ్రెస్.. మెగా అభిమానుల మధ్య ఆసక్తికర చర్చకు తెర తీసినట్లైంది. మేనమాకు మద్దతు ఇచ్చి.. ఆ పక్క రోజు ఆ పార్టీకి బద్ధశత్రువైన పార్టీ అభ్యర్థికి మద్దుతు పలకటం ఏమిటి బన్నీ?