అమరావతి దెబ్బకు గిన్నిస్ గడగడలాడుతోంది

ఆంధ్రప్రదేశ్ రాజధాని అమరావతి పునాదులేసుకోవడానికి ముందే గిన్నిస్ రికార్డులు మోత మోగించేలా కనిపిస్తోంది. అమరావతి శంకుస్థాపన సందర్భంగా చేస్తున్న ఏర్పాట్లు ప్రపంచమంతటినీ ఆకర్షిస్తున్నాయి. దీంతో ఆరంభానికి ముందే అమరావతి ప్రాధాన్యం పెరిగిపోతోంది.

ఆహ్వానితుల సంఖ్య, అంతర్జాతీయ ప్రాధాన్యం కారణంగా ఈ ఏర్పాట్లలో చాలావరకు గిన్నిస్ రికార్డుకు అర్హమైనవని ప్రభుత్వ వర్గాలు చెబుతున్నాయి. అమరావతి శంకుస్థాపనకు రమ్మంటూ ఇప్పటివరకు 4,08994 మందిక ఆహ్వానాలు అందాయి. ఇది చిన్న సంఖ్య కాదు.. ప్రపంచంలో ఏ కార్యక్రమానికి కూడా ఇంతమంది ఆహ్వాన పత్రాలు అందలేదని చెబుతున్నారు.

అలాగే పెద్ద ఎత్తున ప్రజాప్రతినిధులు ఒకేసారి ఒకే కార్యక్రమంలో పాల్గొంటుండడం కూడా రికార్డు కానుంది. ప్రధాని మొదలుకుని ముఖ్యమంత్రులు - గవర్నర్లు - ఎమ్మెల్యేలు - ఎంపీలు - ఎమ్మెల్సీలు... గ్రామస్థాయిలో సర్పంచిలు, వార్డుసభ్యులు వరకు భారతదేశంలోని ప్రజాప్రతినిధి వ్యవస్థ లో అన్ని పదవుల్లో ఉన్నవారూ ఈ కార్యక్రమంలో పాల్గొంటున్నారు. దీన్ని కూడా రికార్డుగానే చెబుతున్నారు. అదేసమయంలో కేంద్ర ప్రభుత్వానికి చెందిన 1353 మంది ఒకే కార్యక్రమంలో పాల్గొంటుండడం కూడా గిన్నిస్ రికార్డు అవుతుందని చెబుతున్నారు.

మరోవైపు 16 వేల గ్రామాలు - పట్టణాలు - నగరాల నుంచి మట్టి - నీరు సేకరించడం ప్రపంచ చరిత్రలో ఇంతవరకు ఎక్కడాలేదు. వీటన్నిటి వల్ల అమరావతి ఆరంభంలోనే రికార్డులు నమోదు చేస్తోంది.