ట్విట్టర్ లో ప్రజారాజధాని పండుగ

ఆంధ్రప్రదేశ్ రాజధాని అమరావతి శంకుస్థాపన కార్యక్రమాన్ని అంగరంగ వైభవంగా నిర్వహించబోతున్న రాష్ట్ర ప్రభుత్వం అందుకు తగ్గట్లుగానే దానికి ప్రచారం కల్పించడానికీ ఏర్పాట్లు చేస్తోంది. ఇందుకు సోషల్ మీడియానూ ఉపయోగించుకుంటోంది. ఆక్రమంలోనే ప్రముఖ సోషల్ మీడియా వెబ్ సైట్ ట్విట్టర్ లోనూ ప్రత్యేకమైన హ్యాష్ టాగ్ ఏర్పాటుచేసింది. అమరావతి ప్రజారాజధాని పేరుతో ఏర్పాటు చసిన ఈ హ్యాష్ టాగ్ ఇప్పుడు ట్విట్టర్ లో మంచి ఆదరణ పొందుతోంది.

అమరావతికి సంబంధించిన ఫోటోలను ఇందులో ఎప్పటికప్పుడు అప్ లోడ్ చేయడంతోపాటు ప్రజలు ఫొటోలు, వీడియోలు పోస్టు చేసేందుకు వేదికగా మలిచారు. అంతేకాదు, నచ్చిన పాటలు, పద్యాలనూ ఇక్కడ అందరితో పంచుకోవచ్చు..

శంకుస్థాపనకు ఫొటోలకు ఇది మెగా వేదికగా మారుతోంది. ఇందులో ఇప్పటికే పోస్టు చేసిన వీడియోలు, చిత్రాలు అందరినీ ఆకట్టుకుంటున్నాయి. తెలుగు, ఇంగ్లిష్ లో ఉన్న ఈ కంటెంట్ తో అమరావతి విశేషాలను అందరూ తెలుసుకుంటున్నారు. అమరావతి శంకుస్థాపన సమయం దగ్గరపడుతున్న కొద్దీ సోషల్ మీడియా దీనికి సంబంధించిన అంశాలతో మోతెక్కిపోతోంది. తాజాగా అక్కడ జరుగుతున్న ఏర్పాట్లతో పాటు సందర్శకులతో అమరావతి ప్రాంతం హడావుడిగా మారిపోయింది. ప్రజలు తమ సెల్ ఫోన్ కెమేరాల్లో తాము అక్కడున్న చిత్రాలను తీసుకుంటుంటుండంతో అమరావతి ఏరియాలో సెల్పీల సందడి నెలకొంది.