పాటతో అదరగొట్టేసిన మాజీ సీఎం సతీమణి.. కానీ ఆ డ్రెస్సేంది?

ఎవరెన్ని చెప్పినా.. కొన్ని స్థానాల్లో ఉన్న వారు జాగ్రత్తగా ఉండాల్సిందే. ఒక నటి ధరించే ఫ్యాషన్ వస్త్రాల్ని.. రాజ్యాంగబద్ధమైన పదవుల్లో ఉండేవారు ధరిస్తే ఎలా ఉంటుంది? ప్రజాసేవలో ఉండే ఒక రాజకీయ నేత సతీమణి.. అందునా మాజీ ముఖ్యమంత్రిగా ఉన్న ఆమె.. మరింత జాగ్రత్తగా ఉండాల్సిన అవసరం ఉండదు. ధరించే వస్త్రాల మీద అభ్యంతరాలు ఏమిటంటూ కొందరు మాట్లాడొచ్చు కానీ.. కొన్ని గౌరవనీయమైన స్థానాల్లో ఉండే వారు.. తమ దుస్తుల విషయంలో మరింత జాగ్రత్తగా ఉండాలి. ఆ విషయాన్ని మిస్ అయిన మహారాష్ట్ర మాజీ ముఖ్యమంత్రి దేవేంద్ర ఫడ్నవీస్ సతీమణి అమృతా ఫడ్నవీస్ చేసిన ఒక పాటకు సంబంధించిన వీడియో సోషల్ మీడియాలో దుమారంగా మారింది.

ఈ వీడియోలో ఆమె పాడిన పాట బాగున్నప్పటికీ.. ఆమె ధరించిన దుస్తులు పెద్ద మైనస్ గా మారాయి. తీవ్ర విమర్శలకు తావిస్తున్న ఈ వీడియోలో ఆమె పాడిన పాట సింహళ పాట ‘మణికే మాగే హితే’. ఇంటర్నెట్ ను హీటెక్కిస్తున్న ఈ పాటను అమృతా ఫడ్నవీస్ చాలా అందంగా పాడారు. అందులో మరెలాంటి అభిప్రాయానికి అవకాశం లేదు. పాట పాడిన వైనం కానీ.. ఆమె గొంతు కానీ వంక పెట్టాల్సిన అవసరం లేనట్లుగా ఉంది.

ఒరిజినల్ పాటకు తనదైన మార్కును వేస్తూ కొన్ని మార్పులు చేసిన ఆమె.. తానే స్వయంగా పాడి.. ఆడారు. అంతా ఓకే కానీ.. పాటకు సంబంధించిన వీడియోలో ఆమె ధరించిన కాస్ట్యూమ్ పెద్ద సమస్యగా మారింది. ఈ పాటను వీడియోగా షూట్ చేసే వేళ.. ఆమె ఎరుపు రంగు టైట్ ఫ్యాంట్.. టీ షర్ట్.. దాని మీద వైట్ కలర్ షర్ట్ ధరించారు. ఫంకీగా.. కాస్తంత గ్లామరస్ గా ఉన్న ఈ వీడియోను నెటిజన్లు తిట్టిపోస్తున్నారు. మాజీ ముఖ్యమంత్రి సతీమణి అంటే ఎంత పద్దతిగా ఉండాలి? మరీ.. ఇంత అతి అవసరం లేదని మండిపడుతున్నారు. తమలోని ఆసక్తుల్ని దాచుకోవాల్సిన అవసరం లేదు కానీ.. వాటిని జనాలతో షేర్ చేసుకునే వేళ.. తమకున్న ఇమేజ్ ఏమిటన్న విషయాన్ని మర్చిపోకూడదన్న లాజిక్ అమృత ఎందుకు మిస్ అయినట్లు?