ఈ ఉక్రెయిన్ బ్యూటీ క్వీన్ దేశభక్తికి ఫిదా కావాల్సిందే

ఒకవైపు బాంబులు.. మరోవైపు యుద్ధ విమానాల దాడులు.. వెరసి ఎప్పుడేం జరుగుతుందో అస్సలు అర్థం కాని అనిశ్చితి వాతావరణం చోటు చేసుకుంటున్న వేళలో సాదాసీదా జనాల సంగతిని పక్కన పెడితే.. అపర శ్రీమంతులు.. పారిశ్రామికవేత్తలు.. సెలబ్రిటీలు.. మిగిలిన వర్గాలకు చెందిన పలువురు ప్రముఖులు తట్టాబుట్టా సర్దేసుకు వెళ్లిపోవటం..

ఆ క్రమంలో భాగంగా విదేశాలకు వలస వెళ్లటం యుద్ధాలు చోటు చేసుకునే దేశాల్లో రోటీన్ సీన్ గా చెప్పాలి. తాజాగా ఉక్రెయిన్ పైన రష్యా సైనిక దాడికి పాల్పడుతున్న వేళలో.. లక్షలాది మంది వేరే దేశాలకు వెళ్లిపోతున్న సంగతి తెలిసిందే.

ఇలాంటి వేళ.. అలాంటివేమీ పట్టించుకోకుండా దేశంలోనే ఉండటం ఒక ఎత్తు అయితే.. తన సెలబ్రిటీ స్టేటస్ ను.. పేరు ప్రఖ్యాతుల్ని.. ప్రాణాల్నిపణంగా పెట్టేయాలన్న తీరును ప్రదర్శించిందో బ్యూటీ క్వీన్. సోషల్ మీడియాలో అసలుసిసలు ఉక్రెయన్ బ్యూటీ క్వీన్ గా అభివర్ణించే ఆమె.. ఇప్పుడు హాట్ టాపిక్ గా మారటమే కాదు.. చాలామందిని స్ఫూర్తిగా మారారు.

ఇంతకూ జరిగిందేమంటే.. 2015లో జరిగి మిస్ గ్రాండ్ ఇంటర్నేషనల్ బ్యూటీ కాంటెస్టులో ఉక్రెయిన్ తరఫున పాల్గొన్న అనస్తాసియా లెన్నా యువతి.. తాజాగా జరుగుతున్న యుద్ధంలో తాను సైతం.. అన్న రీతిలో సైన్యంలో పని చేయటానికి ముందుకు రావటం ఆసక్తికరంగా మారింది. రష్యన్లపై దాడికి పిలుపునిస్తూ.. ఉక్రెయిన్ సాదాసీదా పౌరులకు ఆయుధాన్ని అందిస్తోంది ఉక్రెయిన్ ప్రభుత్వం. దీనికి స్పందనగా.. బ్యూటీ క్వీన్ లెన్నా సైన్యంలో చేరేందుకు సిద్ధమైంది.

అందుకు తగ్గట్లే తన ఇన్ స్టా లో ఆమె తన పేరుతో ఉన్న ఫోటోను షేర్ చేసింది.దానికి క్యాప్షన్ గా సరిహద్దు దాటి ఉక్రెయిన్ లో ఎవరు చొరబడ్డా.. వాళ్లను అంతం చేస్తానంటూ చెప్పిన మాటల్ని వింటే.. ఎంత దేశ భక్తి అన్న భావన కలుగక మానదు.