అన్నా రాంబాబు..టీడీపీకి అలా దొరికాడు!

ప్రకాశం జిల్లా గిద్దలూరు నియోజకవర్గం ఎమ్మెల్యే అన్నా రాంబాబు వీడియో ఒకటి తెలుగుదేశం వర్గాల మధ్యన వైరల్ గా మారింది. ఒక ఇంటర్వ్యూలో ఆయన చేసిన వ్యాఖ్యలను తెలుగుదేశం అభిమానులు షేర్ చేస్తూ ఉన్నారు. తను ఎమ్మెల్యే మాత్రమే కాదు - కాంట్రాక్టర్ ను కూడా అని ఆ వీడియోలోనే చెప్పుకున్న అన్నా రాంబాబు పనులు నాసిరకంగా చేయడం గురించి చెప్పుకున్నారు.

తను రాజకీయ నేతను అనే విషయాన్ని పక్కన పెడితే కాంట్రాక్టర్ ను కూడా అనే విషయాన్ని అన్నా రాంబాబు గుర్తు చేశారు ఆ ఇంటర్వ్యూలో. తను రాజకీయ నేతగా మాట్లాడటం లేదని కాంట్రాక్టర్ గా మాట్లాడుతున్నానంటూ చెప్పుకొచ్చారు. తాము కూడా డబ్బులు సంపాదించుకోవడానికే కాంట్రాక్టులు చేస్తామంటూ అన్నా రాంబాబు వ్యాఖ్యానించారు.

అయితే పనుల విషయంలో అధికారులకు - అనేక మందిక ముడుపులు చెల్లించుకోవాల్సి ఉంటుందన్నట్టుగా మాట్లాడారు. అలా అందరికీ లంచాలు ఇవ్వడానికి డబ్బులు ఖర్చు అవుతాయని - తీరా ఆ ప్రభావం పనుల మీద పడుతుందని అన్నారు. అందరికీ లంచాలు ఇచ్చి పనులు నాసిరకంగా చేయాల్సి ఉంటుందని - అప్పుడే తమకు నాలుగు రూపాయలు మిగులుతాయని అన్నా రాంబాబు కుండబద్ధలు కొట్టినట్టుగా మాట్లాడారు.

ప్రస్తుతం ఆయన వైఎస్ ఆర్ కాంగ్రెస్ పార్టీ ఎమ్మెల్యేగా ఉన్న సంగతి తెలిసిందే. ఈ నేపథ్యంలో తాము అధికారులు చేతులు తడిపి - నాసిరకంగా పనులు చేసి డబ్బులు మిగుల్చుకుంటామని ఆయన చెబుతున్నట్టుగా ఉండే వీడియోను ఆ వర్గాలు బాగా షేర్ చేస్తూ ఉన్నాయి. ఇలా ఒక వైఎస్ ఆర్ కాంగ్రెస్ పార్టీ ఎమ్మెల్యే తెలుగుదేశం వర్గాలకు సోషల్ మీడియాలో దొరికారు.