గంటపాటు గాల్లో.. శ్రీలంకలో మరో శక్తివంతమైన కరోనా రకం

చైనాలోని వూహాన్ లో పుట్టిన కరోనా ఇప్పుడు ప్రపంచంలోని ప్రతి మూలకు చేరింది. అయితే ఆయా దేశాల వాతావరణ పరిస్థితులను బట్టి మరింత స్ట్రాంగ్ గా తయారై విస్తరిస్తూ లక్షల మంది ప్రాణాలు తీస్తోంది.

ఇప్పటికే బ్రిటన్, బ్రెజిల్, సౌతాఫ్రికాలో వెలుగుచూసిన కరోనా చాలా ధృడంగా తయారైందని తేలింది. తాజాగా శ్రీలంకలో అంతకుమించిన కరోనా బయటపడింది. కొలంబోలోని ఒక ప్రముఖ రోగనిరోధక శాస్త్రవేత్త అంచనాల ప్రకారం.. ఒక కొత్త కరోనావైరస్ జాతి ఆ దేశంలో కనుగొనబడింది, ఇది దాదాపు 60 నిమిషాల పాటు గాలిలో ఉంటుంది. శ్రీలంకలో గతంలో కనుగొనబడిన వాటి కంటే ఇది చాలా ఎక్కువ శక్తివంతమైనదని తేలింది.

ఈ కొత్త వేరియంట్ కరోనా వైరస్ వేగంగా వ్యాపిస్తుందని.. గాలిలో గంటపాటు జీవిస్తోందని.. సంక్రమిస్తోందని తేలింది. శ్రీ జయవర్ధనపుర విశ్వవిద్యాలయం ఇమ్యునాలజీ, మాలిక్యులర్ సైన్సెస్ విభాగాధిపతి నీలిక మాలావిగే మాట్లాడుతూ - “ఈ కరోనావైరస్ వైవిధ్యం శ్రీలంకలో ఇప్పటివరకు కనుగొనబడినదానికంటే చాలా ఎక్కువగా వ్యాపిస్తుంది. కొత్త జాతి గాలిలో ఉండగలుగుతోంది. దీని తుంపర్లు, బిందువులు దాదాపు గంటసేపు గాలిలో ఉంటాయని ’ తేలిందని ఆయన బాంబు పేల్చారు.

రాబోయే రెండు వారాలు శ్రీలంకలో తీవ్రమైన పరిస్థితి ఎదురుకావచ్చని ఆయన ప్రభుత్వాన్ని హెచ్చరించారు. పబ్లిక్ హెల్త్ ఇన్స్పెక్టర్ అయిన ఉపుల్ రోహనా మాట్లాడుతూ “రాబోయే రెండు ఇంక్యుబేషన్ వారాల వ్యవధిలో వ్యాధి మూడో వేవ్ గా మారి కేసులు పెరుగుతాయి ” అని హెచ్చరించారు. భారతదేశం మాదిరిగానే శ్రీలంక దేశంలో కూడా కరోనా కేసులు వెల్లువెత్తుతున్నాయి. ఆ దేశంలో రోగులతో ఆస్పత్రులు నిండి చికిత్స అందించలేకపోతోంది. సామర్థ్యాన్ని కోల్పోతోంది. శ్రీలంకలో 99,691 కేసులు.. 638 మరణాలు నమోదయ్యాయి. ఆరోగ్య సేవల డైరెక్టర్ ప్రకారం ఆస్పత్రులలో కోవిడ్ రోగులకు చికిత్స చేయడానికి తగినంత ఐసియులు పడకలు ఆ దేశంలో ఉన్నాయి.