మినిస్టర్ రోజా...అంబాసిడర్ కూడా...?

ఆర్కే రోజా చిరకాల కోరిక మంత్రి పదవి. ఆమె మొత్తానికి మినిస్టర్ రోజా అనిపించుకున్నారు. ఆమెకు టూరిజం శాఖ లభించింది. దాంతో పాటు కల్చరల్, స్పోర్ట్స్ శాఖ కూడా ఆమె చూస్తున్నారు. ఈ శాఖలన్నీ బాగా ప్రమోట్ చేయాల్సినవే. గతంలో అయితే ఇలాంటి శాఖలకు సినీ ప్రముఖులు కానీ క్రికెటర్లు కానీ అంబాసిడర్లుగా పనిచేసిన సందర్భాలు అనేక చోట్ల ఉన్నాయి. ఏపీకి సంబంధించి అయితే టూరిజాన్ని బాగా ప్రమోట్ చేయాల్సి ఉంది.

టెంపుల్ టూరిజం, ఎకో టూరిజం, నాచురల్ బ్యూటీ స్పాట్స్ ని ప్రమోట్ చేయడం వంటివి చాలా చేయాలి. గోవా లాంటి రాష్ట్రాలకు టూరిజం వల్లనే బాగా ఆదాయం లభిస్తోంది. ఏపీ కూడా ఆ దిశగా చర్యలు తీసుకుంటే ఆదాయం పెరుగుతుంది. విశాఖ, రాజమండ్రీ, సహా రాయలసీమ ప్రాంతాల్లో కూడా టూరిజం ప్రాజెక్టులు చేపట్టేందుకు ఎన్నో అవకాశాలు ఉన్నాయి.

కొత్త మంత్రి రోజా అయితే ఏపీలో టూరిజాన్ని బాగా అభివృద్ధి చేస్తామని చెప్పారు. దాని కోసం గ్రౌండ్ లెవెల్ లో తాను పర్యటించి అన్ని విషయాలూ తెలుసుకుంటాను అని చెప్పారు. దానికి అనుగుణంగా ప్రాజెక్టులను రూపొందిస్తామని కూడా పేర్కొన్నారు. ఇక ఇప్పటికే ఉన్న ప్రాజెక్టుల మీద అవగాహన కల్పించేందుకు ప్రమోట్ చేసేందుకు తానే అంబాసిడర్ గా వ్యవహరిస్తాను అని రోజా అంటున్నారు.

అవును ఆమె సినిమా నటిగా మంచి గుర్తింపు సాధించారు. అలాగే బుల్లి తెర మీద వివిధ రకాలైన షోలతో జనాలతో ఇప్పటికీ కనెక్ట్ అయి ఉన్నారు. దాంతో తానే అతి పెద్ద ప్రమోటర్ అని చెబుతున్నారు. మరి రోజా మినిస్టర్ గానే కాదు, అంబాసిడర్ గా కూడా ఇక మీదట కనిపిస్తారు రాణిస్తారు అన్న మాట. మరి ఏపీ టూరిజం మీద యాడ్స్ చేస్తే అందులో రోజా కనిపిస్తారేమో చూడాలి. ఏది ఏమైనా సినిమా నటిగా ఆమెకు ఉన్న పాపులారిటీ టూరిజానికి ఎంతో కొంత ఉపయోగపడితే ఏపీ పర్యాటకం పరుగులు తీస్తుంది అని ఆశించవచ్చేమో.