తెలంగాణ పోలీసులు సూపర్ అంటోన్న ఏపీ వ్యక్తి

ఈ ఉదంతం గురించి విన్నంతనే ఇలాంటి సీన్లు సినిమాల్లో మాత్రమే కనిపిస్తాయే అన్న భావన కలుగుతుంది. కానీ.. రీల్ కు ఏ మాత్రం తీసిపోని విధంగా తెలంగాణ పోలీసులు మారారన్న భావన తాజా ఘటన గురించి తెలిస్తే కలుగక మానదు. ఏపీకి చెందిన ఆరిఫ్ సౌదీ నుంచి హైదరాబాద్ కు వచ్చాడు. శంషాబాద్ ఎయిర్ పోర్టుకు వచ్చిన అతను విజయవాడ వెళ్లేందుకు ఎల్బీ నగర్ కు క్యాబ్ బుక్ చేసుకున్నాడు.

ఎల్బీ నగర్ రెయిన్ బో ఆసుపత్రి వద్ద క్యాబ్ దిగాడు. తన లగేజ్ తీసుకునేంతలోనే క్యాబ్ డ్రైవర్ జంప్ అయ్యాడు. అతన్ని ఆపేందుకు ప్రయత్నిస్తే ఆగలేదు. దీంతో షాక్ తిన్న ఆరిఫ్ డయల్ 100కు ఫోన్ చేసి విషయం చెప్పాడు. క్షణాల్లో పోలీసులు అతని ముందు ప్రత్యక్షమయ్యారు.
వెంటనే తమ వద్ద ఉన్న యాప్ తో కారుకు సంబంధించిన సీసీ ఫుటేజ్ చెక్ చేశారు. దాని నెంబరును ట్రాక్ చేశారు. వెంటనే డ్రైవర్ నుగుర్తించారు. అతను ఎల్బీ నగర్ లో ఏ ప్రాంతం నుంచి పారిపోయాడో.. అదే స్పాట్ కు ఆరిఫ్ లగేజ్ తో సహా రావాలని చెప్పారు. దీంతో.. మరో మార్గం లేని డ్రైవర్ కాసేపటికే అక్కడికి వచ్చాడు.

క్యాబ్ డ్రైవర్ వచ్చే వరకూ అక్కడే ఉన్న పోలీసులు.. క్యాబ్ లో నుంచి లగేజ్ తీసి ఆరిఫ్ కు అందజేశారు. క్యాబ్ డ్రైవర్ ను అదుపులోకి తీసుకున్నారు. జరిగిన దానికి ఆశ్చర్యానికి గురయ్యాడు ఆరిఫ్. పోలీసులు తన పట్ల చూపిన శ్రద్ధకు ఫిదా అయ్యాడు. తెలంగాణ పోలీస్ సూపర్ అంటూ పొగడ్తల వర్షం కురిపించాడు.

తెలంగాణ పోలీసులు వినియోగిస్తున్న టెక్నాలజీకి అబ్బురపడిన అతను.. ఇలాంటి పోలీసింగ్ ఉంటే ఎవరికి ఎలాంటి సమస్యలు ఉండవన్నాడు. తెలంగాణ పోలీస్ సూపర్ అంటూ తెగ పొగిడేస్తున్నాడు ఏపీకి చెందిన ఆరిఫ్. విన్నంతనే హుషారు పుట్టించే ఈ ఘటన తెలంగాణ పోలీసులపై ప్రశంసల వర్షం కురిపిస్తున్నారు.