750 మిల్లీ లీటర్లు ఉన్న ఆ వాటర్ బాటిల్ రేటును మీరు ఊహించలేరు

లీటర్ వాటిల్ బాటిల్ ధర ఎంత ఉంటుంది? మామూలుగా అయితే రూ.20. కానీ.. ఖరీదైనదంటే రూ.100. కాదంటే నాలుగైదు వేల వరకు కూడా ఉంటాయని తెలిసిందే. కానీ.. ఇప్పుడు చెప్పే వాటర్ బాటిల్ వ్యవహారం అందుకు మించింది. ఆ మాటకు వస్తే.. లీటర్ కంటే తక్కువ.. మరింత సరిగ్గా చెప్పాలంటే అక్షరాల 750 మిల్లీ లీటర్లు మాత్రమే. కానీ.. ఈ వాటర్ బాటిల్ కొనుగోలు చేయాలంటే సామాన్యులు.. మధ్య తరగతుల వారు తమ జీవితకాలపు ఆస్తుల్ని అమ్మాల్సిందే. అవును.. సదరు వాటర్ బాటిల్ రేటు జస్ట్ రూ.45 లక్షలు మాత్రమే.

సీఈవోల జీతాలకు సరిసమానంగా ఉండే ఈ వాటర్ బాటిల్ ఉండే నీళ్లల్లో ఏముంటుంది? ఎందుకింత ఖరీదు అంటే.. దాని గురించి బోలెడన్ని విశేషాల్ని చెబుతుంటారు. ఇంతకీ ఈ లక్షలు చేసే నీళ్ల బాటిల్ పేరేమిటంటే.. 'అక్వా డిక్రిస్టలో ట్రిబ్యుటొ ఎ మోడి్గ్లియాని' గా పిలుస్తారు. ఇందులో ఉండే నీళ్లు ఇంతకు ముందు చెప్పినట్లు 750మి.లీ. మాత్రమే ఉంటాయి. ఈ నీటిని ఫ్రాన్స్.. ఫిజీలలోని సహజ నీటి బుగ్గల నుంచి సేకరిస్తారని చెబుతారు. అంత మాత్రానికే అంత రేటా? అన్న సందేహం రావొచ్చు. కానీ.. ఈ బాటిల్ తయారీని రోటీన్ కు భిన్నంగా తయారుచేస్తారని చెబుతున్నారు.

ఈ వాటర్ బాటిల్ లోపలి భాగాన్ని 24 క్యారెట్ల బంగారంతో తయారు చేయటం ఒక విశేషం అయితే.. ఈ బాటిల్ షేప్ ను ప్రపంచంలోనే ప్రసిద్ధి చెందిన బాటిల్ డిజైనరల్ ఫెర్నాండో అల్టామిరానో డిజైన్ చేశాడు. ఈ బాటిల్ లో ఉండే నీళ్లు ప్రత్యేకమైన రుచితో ఉంటాయి. మార్కెట్లో లభించే యావరేజ్ వాటర్ కంటే ఎక్కువ శక్తిని అందిస్తుందట. ఇవన్నీ బాగానే ఉన్నాయి కానీ.. ఇంత డబ్బులు పోసి ఎవడు కొంటాడండి.. ఈ వాటర్ ను అంటే.. బోలెడంత మంది సెలబ్రిటీలు.. సంపన్నులు దీన్ని కొనేందుకు ఆసక్తిని చూపిస్తారని చెబుతున్నారు. ఒక బాటిల్ కొనే ఖర్చుతో.. ఒకడి జీవితం శాశ్వితంగా బాగుపడిపోవటం ఖాయం కదూ? సంపన్నులకు అలాంటి ఆలోచనలు ఎందుకు రావో?