ప్రతీకారం తీర్చుకునే పనిలో భారత్

గడిచిన కొన్నినెలలుగా భారత.. పాక్ సరిహద్దు ప్రాంతాల్లో ఎలాంటి పరిస్థితి ఉందో తెలిసిందే. ఉరీ ఉగ్రఘటనతో హైటెన్షన్ షురూ అయి నేటికీ సాగుతూనే ఉంది. ఉరీ ఉగ్రఘటన తర్వాత.. పాకిస్థాన్ ఆక్రమిత కశ్మీర్ లో తీవ్రవాదుల పని పట్టటానికి భారత్ జరిపిన సర్జికల్ స్ట్రైక్స్ తో రెండు దేశాల మధ్య ఉద్రికత్తలు పీక్ స్టేజ్ కి వెళ్లిపోయాయి. నాటి నుంచి నేటి వరకూ నిత్యం భారత్ పై ఏదో రకంగా బదులు తీర్చుకునేందుకు దాయాది దుష్టపన్నాగాల్ని పన్నుతూనే ఉంది.

ఇటీవల భారత సైనిక స్థావరాల్ని లక్ష్యంగా చేసుకొని కాల్పులు జరపటం.. ముగ్గురు వీర జవాన్లను పొట్టన బెట్టుకోవటం ఒక ఎత్తు అయితే.. ఒక జవాను తల నరికివేసిన తీరుపై భారత సైనిక వర్గాలు తీవ్ర ఆగ్రహాన్ని వ్యక్తం చేస్తున్నాయి. కాల్పుల ఉల్లంఘనకు తెగబడిన పాకిస్థాన్ తీవ్రవాదులు.. భారత సైనికుడి విషయంలో వ్యవహరించిన తీరుపై అంతకంతకూ తీర్చుకోవాలన్న ఆగ్రహాన్ని సైనిక వర్గాలు వ్యక్తం చేస్తున్నాయి.

మచ్చిల్ సెక్టార్ లో భారత సైనికులపై మెరుపుదాడులకు దిగేందుకు పాక్ సిద్ధంగా ఉందన్న సమాచారంతో భారత సైనికులు అలెర్ట్ గా ఉన్నారు. దాయాది దుర్మార్గానికి బదులు అన్న రీతిలో భారత సైన్యం భారీ ఎత్తున దాడులు చేపట్టినట్లుగా చెబుతున్నారు.ముగ్గురు జవాన్లను బలి తీసుకున్న ఉదంతంపై బదులు తీర్చుకుంటామని భారత సైనిక వర్గాలు స్పష్టం చేస్తున్నాయి. అత్యంత పాశవికంగా వ్యవహరిస్తున్న దాయాదికి దిమ్మ తిరిగిపోయే భారీ షాక్ ఇవ్వాలన్న భావన దేశ ప్రజల్లో అత్యధికుల్లో ఉంది. ఆ ఆకాంక్షను తీర్చే సమయం ఎప్పటికి వస్తుందో..?

Like Us on Facebook : https://www.facebook.com/Tupakidotcom/