ఇది విన్నారా.. అర్నాబ్ గోస్వామి ఔట్

ఇంగ్లిష్ న్యూస్ ఛానెళ్లను ఫాలో అయ్యే వారికి అర్నాబ్ గోస్వామి గురించి కొత్తగా పరిచయం చేయాల్సిన అవసరం లేదు. ఇండియాలో మోస్ట్ పాపులర్ న్యూస్ ప్రెజెంటర్ ఎవరంటే మరో మాట లేకుండా అర్నాబ్ పేరు చెప్పేయొచ్చు. టైమ్స్ నౌ ఛానెల్లో అర్నాబ్ నిర్వహించే ‘న్యూస్ అవర్’ కార్యక్రమం సూపర్ పాపులర్. రోజూ రాత్రి ప్రైమ్ టైంలో అరగంట పాటు అర్నాబ్ నిర్వహించే చర్చా కార్యక్రమానికి టీఆర్పీ రేటింగ్స్ ఓ రేంజిలో ఉంటాయి. చాలా ఆవేశంగా.. గట్టిగా అరుస్తూ చర్చా కార్యక్రమాలు నిర్వహించే అర్నాబ్.. సోషల్ మీడియాలో ఎప్పుడూ హాట్ టాపిక్ అవుతుంటారు. కొన్ని రోజుల కిందట భారత్-పాకిస్థాన్ మధ్య సరిహద్దు పోరాటం నేపథ్యంలో హాట్ హాట్ చర్చలతో మరింతగా పాపులర్ అయిన అర్నాబ్.. సడెన్ గా టైమ్స్ నౌ ఛానెల్ నుంచి తప్పుకోవడం సంచలనం రేపుతోంది.

ఏమైందో ఏమో కానీ.. కొన్ని రోజులుగా అర్నాబ్ ‘న్యూస్ అవర్’ కార్యక్రమంలో కనిపించలేదు. ఆయన లేక ఆ షో కళ తప్పింది. ఏదైనా అనారోగ్య కారణాలతో రావట్లేదేమో అనుకున్నారు కానీ.. ఆయన ఈ ఛానెల్లో ఎడిటర్ పదవికే రాజీనామా చేసి అందరినీ ఆశ్చర్యపరిచారు. తన షోకు ఎంత పెద్ద నాయకుడు వచ్చినా.. వాళ్లను మాట్లాడనివ్వకుండా శ్రుతి మించి వ్యవహరిస్తాడని.. అతిథుల మీద పడి అరిచేస్తాడని.. కరిచేస్తాడని అర్నాబ్ కు చెడ్డ పేరు కూడా ఉంది. ఇటీవలి చర్చల్లో అర్నాబ్ మరీ శ్రుతి మించిపోయాడు కూడా. భారత్-పాక్ పోరాటంపై చర్చల సందర్భంగా ఆయన పాకిస్థాన్ మీద తీవ్ర స్థాయిలో విరుచుకుపడటంతో కొన్ని హెచ్చరికలు కూడా అందుకోవాల్సి వచ్చింది. దీంతో ప్రభుత్వం వై కేటగిరీ భద్రత కూడా కల్పించింది. ఇలాంటి టైంలో అర్నాబ్ తన పదవికి రాజీనామా చేయడం అనూహ్య పరిణామమే. మరి ఇకపై అర్నాబ్ ఏం చేయబోతున్నాడో చూడాలి.