వామ్మో.. ఇవేం మాటలు కేటీఆర్.. అంతలా అనేస్తున్నారు?

తెలంగాణ రాజకీయాల్లో ఇప్పుడో సంచలనం నిజామాబాద్ బీజేపీ ఎంపీ ధర్మపురి అర్వింద్. నిప్పులు కురిపించే మాటలతో ఉక్కిరిబిక్కిరి చేయటం.. నోటి మాటలతో ఒంటికి కారం రాసిన ఫీలింగ్ తేవటంలో ఆయనకు ఆయనే సాటిగా చెప్పాలి. బండి సంజయ్ ముందు వరకు పద్దతిగా మాట్లాడే బీజేపీ నేతలకు భిన్నంగా.. రానున్న రోజుల్లో బీజేపీ నుంచి వచ్చే నేతలు ఎలా ఉండాలన్న దానికి మార్గదర్శనం చేసేలా అర్వింద్ తీరు ఉందంటున్నారు.

దుబ్బాక ఉప ఎన్నిక నుంచి కేసీఆర్ ఫ్యామిలీపై తరచూ తీవ్ర వ్యాఖ్యలు చేస్తున్న ఆయన.. తాజాగా తమ కార్యకర్త అభిషేక్ పై మంత్రి కేటీఆర్ చేసిన విమర్శలపై ప్రెస్ మీట్ పెట్టి.. మాటలతో ఉతికినంత పని చేశారు. మంత్రి కేటీఆర్ ప్రెస్ మీట్ లో ప్రస్తావించిన ప్రతి అంశంపైనా తీవ్రంగా స్పందించిన అరవింద్.. మాటల మధ్యలో కేటీఆర్.. కేసీఆర్.. కవిత.. హరీశ్ లపైనా విరుచుకుపడ్డారు.

‘‘నువ్వో మంత్రిగి ఉండి.. మీ అయ్య పెట్టిన భిక్ష. మీ నాయన తెలంగాణ ఉద్యమం కోసం కేంద్రం కార్మిక మంత్రిగా ఉన్నప్పుడు.. అప్పటి కాంగ్రెస్ ప్రభుత్వం తెలంగాణ ఉద్యమాన్ని నీరుకారుస్తుందని రాజీనామా చేయటానికి రెఢీ అయితే..ఈయన అమెరికాలో ఏదో కూలి పనేదో చేసుకుంటున్నాడు. ఈయన చెప్పిన మాటలేందంటే.. అది వచ్చేదా? పోయేదా? కేంద్రమంత్రి పదవికి రాజీనామా చేస్తానంటున్నాడు అంటూ నాయనని అనరాని మాటలు అన్నోడు. తెలంగాణ మీద ఈయనకు ఉన్న కమిట్ మెంట్. ఇయాల ఈయన వచ్చి మంత్రి పదవిలో కూర్చున్నాడు. డిఫ్యాక్టో చీఫ్ మినిస్టర్. వాళ్ల నాయన ఎటూ పని చేయడు. ఆఫీసర్లు.. మంత్రులు.. ఎమ్మెల్యేలు అంతా ఈయన చుట్టూ తిరుగుతుంటారు. ఈయన చుట్టూ తక్కువ తిరుగుతున్నారు. సంతోష్ చుట్టూ ఎక్కువ తిరుగుతున్నారని.. ఫస్ట్రేషన్ తో ఎక్కువగా ప్రెస్ మీట్లు పెట్టేస్తున్నారు. పనికిమాలిన మాటలు మాట్లాడుతున్నాడు’’ అని ఫైర్ అయ్యారు.

కేటీఆర్ ప్రాతినిధ్యం వహిస్తున్న సిరిసిల్లలో తీవ్రమైన వ్యతిరేకత ఉందని.. వచ్చే ఎన్నికల్లో కేటీఆర్ ఓడకపోతే అప్పుడు అడగాలన్నారు. ‘‘ఖబడ్డార్ కేటీఆర్. దుబ్బాకలో ఏడు చెరువుల నీళ్లు తాగించాం. సిరిసిల్లలో నువ్వు ఓడకపోతే నన్ను అడుగు. నువ్వు మగాడివి అయితే.. బీజేపీ కార్యకర్త అభిషేక్ కు క్షమాపణలు చెప్పాలి’’ అని పేర్కొన్నారు. అక్రమ కట్టడాల కూల్చివేత మీద కేటీఆర్ మాటల్ని తీవ్రంగా తప్పు పట్టారు. ప్రెస్ మీట్ లో కిర్లోస్కర్ కమిటీ గురించి మాట్లాడారని.. గతంలో ఇదే కేటీఆర్ తెలంగాణ అసెంబ్లీలో మాట్లాడుతూ.. కిర్లోస్కర్ కమిటీ చేసిన సూచనలు ఆచరణ సాధ్యం కాదన్నారంటూ దానికి సంబంధించిన నోట్ ను చదివి వినిపించారు. గుజరాత్ లో మోడీ సీఎంగా ఉన్నప్పుడు 2లక్షలఅక్రమ కట్టడాల్ని కూల్చేశారని.. అదే ఏడాదిజరిగిన మున్సిపల్ ఎన్నికల్లో 90 శాతం సీట్లను సొంతం చేసుకున్నారన్నారు. పాతబస్తీలో పాన్ డబ్బాను కదిలించాలన్నా కేటీఆర్ ఫ్యాంటు తడుపుకుంటాడని.. ఓవైసీకి అంతలా భయపడతారంటూ వ్యంగ్యంగా వ్యాఖ్యలు చేశారు. ఇంత ఘాటుగా వ్యాఖ్యలుచేసిన అరవింద్ పై కేటీఆర్ ఎలా స్పందిస్తారన్నది ఇప్పుడు ఆసక్తికరంగా మారింది.