కేసీఆర్‌ ను పొగిడేసిన ఓవైసీ

తెలంగాణ ముఖ్యమంత్రి కల్వకుంట్ల చంద్రశేఖర్‌ రావు ప‌రిపాల‌న‌ను ఎంఐఎం అధినేత‌ - హైద‌రాబాద్‌ ఎంపీ అసదుద్దీన్ ఓవైసీ ప్ర‌శంసించారు. ఈజ్ ఆఫ్ డూయింగ్ బిజినెస్‌ లో తెలంగాణ‌ రాష్ర్టానికి మొదటి ర్యాంకు రావడం ప‌ట్ల‌ సంతోషం వ్య‌క్తం చేసిన ఓవైసీ ఈ సంద‌ర్భంగా కేసీఆర్‌ ను అభినందించారు. కేసీఆర్ నేతృత్వంలో రాష్ట్రం అభివృద్ధిలో దూసుకుపోతోందని పేర్కొన్నారు. సీఎం కేసీఆర్ వల్లే రాష్ర్టానికి ఈజ్ ఆఫ్ డూయింగ్‌ లో ఫస్ట్ ర్యాంకు వచ్చిందన్నారు.

హైద‌రాబాద్‌ లో ఓవైసీ మీడియాతో మాట్లాడుతూ రాష్ట్రం ఏర్పడిన కొన్నాళ్లలోనే సీఎం కేసీఆర్‌ తనదైన ముద్ర వేయగలిగారని ప్రశంసించారు. రాష్ర్టానికి పెట్టుబడులు సాధించడంలో ఎంతో ముందున్నామని తెలిపారు. గ‌తంలో వెల్లువెత్తిన ప‌లు సందేహాల‌ను పటాపంచ‌లు చేసి పెట్టుబ‌డులు ఆక‌ర్షించ‌డంలో కేసీఆర్ సార‌థ్యంలోని ప్ర‌భుత్వం అద్భుత‌మైన ప‌నితీరును క‌న‌బ‌రుస్తోంద‌ని ఓవైసీ మెచ్చుకున్నారు. తెలంగానకు వ‌చ్చిన నంబ‌ర్ వ‌న్ స్థానంపై ప్ర‌తిప‌క్షాలు విమ‌ర్శ‌ళు చేస్తున్న స‌మ‌యంలో ఓవైసీ మెచ్చుకోవ‌డం రాజ‌కీయ‌వ‌ర్గాల్లో చ‌ర్చ‌నీయాంశంగా మారింది.

Like Us on Facebook : https://www.facebook.com/Tupakidotcom/