స్పీకర్ షీలా దీక్షిత్ అట‌- ఏపీ మంత్రి ఉవాచ‌

మ‌న లోక్ స‌భ స్పీక‌ర్ కాంగ్రెస్ సీనియ‌ర్ నాయ‌కురాలు, ఢిల్లీ మాజీ సీఎం షీలాదీక్షిత్ అని తెలుసా మీకు? ఔనా! బీజేపీ సీనియ‌ర్ నేత సుమిత్రా మహాజన్ స్పీక‌ర్‌ గా కొన‌సాగుతున్నారు క‌దా? కాంగ్రెస్ మ‌హిళానేత‌ షీలాదీక్షిత్ ఎప్పుడు లోక్‌ సభ స్పీకర్ ఎప్పుడు అయ్యారు? అని సందేహప‌డుతున్నారా? అంత కంగారు ప‌డకండి. లోక్‌ స‌భ‌ స్పీక‌ర్ సుమిత్ర మహాజన్ నిక్షేపంగా అదే పదవిలో కొనసాగుతున్నారు. షీలాదీక్షిత్‌ లో ఇంకా యూపీ ఎన్నికల అవమానభారం నుంచి కోలుకోక‌పోవ‌డంతో రాజ‌కీయాల‌కు కాస్త దూరంగా ఉండిపోయారు. మరి షీలాదీక్షిత్‌ ను లోక్‌ సభ స్పీకర్ ఎవరు నియమించారనుకుంటున్నారా? ఇంకెవరు.. రాష్ట్ర రవాణాశాఖ మంత్రి కింజారపు అచ్చెన్నాయుడు!

ఇలా చిత్రంగా స్పీక‌ర్ మేడ‌మ్‌ నే మార్చేసిన ఘ‌న‌త వెనుక ఆసక్తిక‌ర‌మైన ప‌రిణామం ఉంది. మంత్రి అచ్చెన్నాయుడు సోదరుడైన కేంద్రమాజీ మంత్రి - దివంగత ఎర్రన్నాయుడు తనయుడు - శ్రీకాకుళం ఎంపి రామ్మోహన్‌ నాయుడు మ్యారేజ్ రిసెప్షన్ వేడుక న్యూఢిల్లీలో ఈనెల 19న ఘనంగా జరిగింది. ఈ వేడుక‌కు ప్రధాని మోడీతోపాటు కేంద్రమంత్రులు కూడా హాజరయి - వధూవరులను ఆశీర్వదించారు. అయితే.. రామ్మోహన్ రిసెప్షన్ వేడుకకు హాజ‌ర‌యిన వారిలో లోక్‌ సభ స్పీకర్ షీలాదీక్షిత్ కూడా హాజరయ్యాయని అచ్చెన్నాయుడు తన ఫేస్‌ బుక్ అకౌంటులో పెట్టారు. ఇంకేముంది..దీన్ని గ‌మ‌నించిన కొంద‌రు నెటిజ‌న్లు మంత్రి గారి అకౌంట్‌ లోని చిత్రాల‌ను పెడుతూ సోషల్‌ మీడియాలో సెటైర్లు వేస్తున్నారు. త‌మ‌దైన శైలిలో కామెంట్లు కూడా జోడిస్తున్నారు.