తెలంగాణ అసెంబ్లీలో ‘బాహుబలి’ ముచ్చట

రాజకీయాలంటేనే రచ్చ. ఇక.. అసెంబ్లీ సమావేశాలంటే ప్రత్యేకించి చెప్పాల్సిన అవసరమే లేదు. ఏ చిన్న అవకాశాన్ని వచ్చినా రాజకీయంగా రచ్చ రచ్చ చేసుకునే రాజకీయ పార్టీల మధ్య రాజకీయాలు తప్పించి మరో అంశం చర్చకు రాదు. ఒకవేళ వచ్చినా అనూహ్య పరిణామాల మీదనే తప్పించి.. సాధారణంగా మరో ప్రస్తావన ఉండదు. ఇక.. సినిమాల గురించి చర్చ జరిగే ఛాన్స్ ఉండదు. ఒకవేళ చర్చ జరిగినా అది సినిమాల్లోని వివాదాస్పద అంశాల మీదనే ఉంటాయి. కానీ.. దీనికి భిన్నంగా మంగళవారం తెలంగాణ అసెంబ్లీలో ఒక పరిణామం చోటు చేసుకుంది.

జాతీయ స్థాయి ఉత్తమ చిత్రంగా తొలిసారి అవార్డు అందుకున్న బాహుబలి సినిమాను తెలంగాణ అసెంబ్లీ ప్రత్యేకంగా అభినందించింది. కలెక్షన్ల రికార్డుల్ని తిరగరాసి.. తెలుగు సినిమా రేంజ్ ను ఎక్కడికో తీసుకెళ్లిన బాహుబలికి..జాతీయ అవార్డు లభించటం పట్ల తెలంగాణ ముఖ్యమంత్రి కేసీఆర్ ప్రత్యేకంగా అభినందనలు తెలిపారు. జాతీయ ఉత్తమ చిత్రంగా ఎంపికైన బాహుబలి తెలుగు సినిమా పరిశ్రమ సత్తాను చాటి చెప్పిందని కీర్తించారు. అంతేకాదు.. బాహుబలికి అభినందనలు తెలుపుతూ.. తెలంగాణ అసెంబ్లీ ప్రత్యేక తీర్మానాన్ని ఆమోదించింది. నిత్యం రాజకీయాలు మాత్రమే వినిపించే అసెంబ్లీలో.. అందుకు భిన్నంగా ఒక తెలుగు సినిమాకు ప్రశంసలు లభించటమేకాదు.. పార్టీలన్నీ తమ అభినందనల్ని చెప్పటం.. తెలుగు చిత్రపరిశ్రమకు సరికొత్త స్ఫూర్తినిస్తుందనటంలో సందేహం లేదు.