బాలయ్య వెళుతున్నాడు సరే..బాబు మాటేమిటి.

తెలంగాణ ప్రాంతంలో అత్యంత వైభవంగా నిర్వహించే సమ్మక్క.. సారలమ్మ జాతరకు ఏపీ ముఖ్యమంత్రి చంద్రబాబు బావమరిది కమ్ వియ్యంకుడు బాలకృష్ణ వెళుతున్నారు. దైవభక్తి మెండుగా ఉండే బాలకృష్ణకు పూజలు.. పునస్కారాలు అంటే మక్కువ ఎక్కువ. తాజాగా ఆయన సమ్మక్క.. సారలమ్మ జాతరకు వెళ్లేందుకు రెఢీ అయ్యారు. జాతరకు వియ్యంకుడు వెళుతున్నారు సరే. మరి.. ఏపీ ముఖ్యమంత్రి చంద్రబాబు సంగతి ఏమిటి? అన్నదే ఇప్పుడు ప్రశ్నగా మారింది.

తెలంగాణకు సంబంధించిన ప్రతి ముఖ్యమైన కార్యక్రమాలకు బాబు తప్పనిసరిగా హాజరవుతున్నారు. ఎన్నికల ప్రచారం మొదలుకొని.. తెలంగాణ ప్రజలు భావోద్వేగంతో మమేకమైపోయే ఏ అంశాన్ని ఆయన వదిలిపెట్టటం లేదు. తాను నిత్యం చెప్పే రెండు కళ్ల సిద్ధాంతానికి తగినట్లుగానే వ్యవహరిస్తున్న చంద్రబాబు జాతరకు వస్తారా అన్నది ఒక ఆసక్తికరమైన ప్రశ్నగా మిగిలింది.

సమ్మక్క సారలమ్మ జాతరలో మరో రోజు మాత్రమే మిగిలి ఉంది. ఇప్పటివరకూ బాబు మేడారం ట్రిప్ ప్రస్తావనే తెలుగు తమ్ముళ్లు తీసుకురావటం లేదు. తెలంగాణ ప్రజలు ఎంతో ప్రాధాన్యత ఇచ్చే మేడారం జాతరకు ఆయన హాజరు అవుతారా? లేక ఒక సెంటిమెంట్ అవకాశాన్ని వదులుకుంటారా? అన్నది చూడాలి.