కేసీఆర్ పై తీవ్రవ్యాఖ్యలు చేసిన బండి సంజయ్

తెలంగాణ బీజేపీ అధ్యక్షుడు బండి సంజయ్ మరోసారి నిప్పులు చెరిగారు. కేసీఆర్ సర్కార్ పై దారుణ వ్యాఖ్యలతో విరుచుకుపడ్డారు. తెలంగాణ ఎమ్మెల్సీ ఎన్నికల్లో బీజేపీ ఓటమిపై ఆయన హైదరాబాద్ బీజేపీ కార్యాలయంలో మీడియాతో మాట్లాడారు. ఈ ఎన్నికల్లో బీజేపీని ఓడించడానికి ఇతర రాజకీయ పక్షాలు లోపాయికారి ఒప్పందాలను కుదుర్చుకున్నాయని బండి సంజయ్ ఆరోపించారు. ఈ ఎన్నికల్లో నైతిక విజయం తమదేనన్నారు.తాము ఓడిపోతే పీఆర్సీ ఇవ్వమంటూ టీఆర్ఎస్ ఉద్యోగులను బ్లాక్ మెయిల్ రాజకీయాలు చేసిందని బండి సంజయ్ ఆరోపించారు. ఆ బెదిరింపులతోనే ఓటర్లు అధికార పార్టీకి ఓటు వేశారని బండి అన్నారు. పీఆర్సీపై తాము పోరును కొనసాగించామని.. కేసీఆర్ గల్లాపట్టుకుంటామని హెచ్చరించారు.

బీజేపీని ఓడించానికి కాంగ్రెస్ ను వాడుకున్నారని బండి సంజయ్ ఆరోపించారు. బీజేపీని ఎదుర్కోవడానికి తన ముఖం చూపించలేకపోయారని.. అందుకే కాంగ్రెస్, పీవీ నరసింహరావు పేరును అడ్డుగా పెట్టుకొని గెలిచారని చెప్పారు. ఈ ఎన్నికల్లో కేసీఆర్ గెలిచినట్టా..? పీవీ నరసింహరావు గెలిచినట్టా అని బండి ప్రశ్నించారు.

కేసీఆర్ ఓ రాక్షసుడిలా మారారని ధ్వజమెత్తారు. కేసీఆర్ ముఖం చూడడానికి ప్రజలవెరూ సిద్ధంగా లేరని బండి సంజయ్ అన్నారు.బలిదానాలతో ఏర్పాటైన తెలంగాణను కేసీఆర్ చేతుల్లో పెట్టారని.. ప్రజాభీష్టానికి వ్యతిరేకంగా ముఖ్యమంత్రి కేసీఆర్ నడుచుకుంటున్నారని బండి సంజయ్ విమర్శించారు.

అసెంబ్లీలో టీఆర్ఎస్ ను గెలిపించిన ప్రజలు లోక్ సభ ఎన్నికల్లో బీజేపీని గెలిపించారని.. ఢిల్లీకి పోయి కేసీఆర్ ఏం తిప్పలేడని అర్థమైందని బండి సంజయ్ అన్నారు.. తమ వైఫల్యాలన్నింటిని కేంద్రప్రభుత్వంపై మోపడం కేసీఆర్ సర్కార్ కు అలవాటైందని.. అన్నింటిని కేంద్రంపై మోపితే రాష్ట్ర సీఎంగా కేసీఆర్ ఏం పీకుతున్నాడని బండి సంజయ్ దారుణ వ్యాఖ్యలు చేశారు.