టీజర్ల ఊరింపు ఎంత కాలం? సినిమా ఎప్పుడు చూపిస్తారు బండి?

గులాబీ నేతలపై మొహమాటం లేకుండా మాట్లాడే బీజేపీ నేతల్లో బండి స్థానం ముందుంటుంది. ఒంటికాలిపై విరుచుకుపడే ఆయన.. ఇటీవల కాలంలో ఒక మాటను అదే పనిగా చెబుతున్నారు. టీఆర్ఎస్ నేతల భాగోతాల చిట్టా తమ వద్ద ఉందంటూ ఊరిస్తుంటారు. అందరి జాతకాలు తమ వద్ద ఉన్నాయని.. వారి బండారం బయటపెడతానని చెబుతుంటారు. ముఖ్యమంత్రి కేసీఆర్ ను జైలుకు పంపటం ఖాయమన్న మాట ఆయనకు ఒక ఊతపదంగా మారింది. తప్పులు చేస్తే.. ఎంతటి వారైనా తిప్పలు తప్పవన్న విషయం తెలిసిందే.

కాకుంటే.. ఇప్పటివరకు ఒక్క ఆధారం చూపించకుండా.. అదే పనిగా మాటలు చెప్పటం అంత బాగోలేదన్న మాట వినిపిస్తోంది. టీఆర్ఎస్ మంత్రులు.. ఎమ్మెల్యేల అవినీతి భాగోతం ఉంటే.. డైలీ సీరియల్ మాదిరి బయటకు వెల్లడిస్తే.. వారు చేసిన మోసాలు.. అక్రమాలు అందరికి తెలుస్తాయి. బండి వద్ద ఉన్న సమాచారం ఏమిటో తెలీదు కానీ.. ఆయన తన మాటల్ని టీజర్లుగా మార్చి ఊరిస్తుంటారే తప్పించి.. అసలు సినిమా విడుదల ఎప్పుడన్న విషయాన్ని మాత్రం చెప్పకపోవటాన్ని పలువురు ప్రశ్నిస్తున్నారు.

తెలంగాణ మంత్రులు.. ఎమ్మెల్యేల భూకబ్జా వివరాల్ని తాను బయటపెడతానని చెప్పారు. ప్రగతిభవన్ తెలంగాణ ద్రోహులకు అడ్డాగా మారిందని విరుచుకుపడ్డారు. బండి వారి దగ్గర ఉన్న ఆధారాలు బయట పెట్టిన తర్వాతే ఆయన మాటల్లో నిజం ఎంత ఉందన్న విషయం తెలుస్తుంది. అంతే తప్పించి.. ఉత్తినే మాట్లాడితే ప్రయోజనం ఉండదన్న విషయాన్ని తెలంగాణ బీజేపీ అధ్యక్షుల వారు ఎంత త్వరగా గ్రహిస్తే అంత మంచిది. ఇంతకూ.. బండి వారు చూపించే సినిమా ఎప్పుడు విడుదల? అన్నది క్వశ్చన్ గా మారింది.