మ‌రో `చంద్రుడి`ని సృష్టిస్తోన్న చైనా!

చైనా.... దాదాపుగా ప్ర‌పంచంలో త‌యారైన ప్ర‌తి వ‌స్తువుకు న‌కిలీ త‌యారు చేయ‌గ‌ల స‌త్తా ఉన్న దేశం. బ్రహ్మ సృష్టికి మ‌నిషి ప్ర‌తి సృష్టి చేయ‌లేడేమోగానీ....మొబైల్ ఫోన్ నుంచి మెర్సెడెస్ బెంజ్ వ‌ర‌కు ....అన్నింటినీ ప్ర‌తి సృష్టించ‌గ‌ల నైపుణ్యం చైనీయుల సొంతం. చైనా....అని పిల‌వ‌గానే....నేను `చెయ్య‌నా`....అని `చైనా` రెడీగా ఉంటుంద‌ని ఓ సోష‌ల్ నానుడి. ఈ నేప‌థ్యంలో చైనా..తాజాగా చంద్రుడికి ప్ర‌తిసృష్టి చేసేందుకు పూనుకుంది. `కృత్రిమ చంద్రుడు`ని ఆకాశంలో ప్ర‌తిష్టించేందుకు చైనా రెడీ అవుతోంది. 2020నాటికి చైనాలోని సిచువాన్ ప్రావిన్స్ ద‌గ్గ‌ర చెంగ్డు న‌గ‌రంలో ప్ర‌యోగాత్మ‌కంగా ఆ చంద్రుడిని ఏర్పాటు చేయ‌బోతున్నారు. ఆకాశంలో శాటిలైట్ సాయంతో ఆ కృత్రిమ చంద్రుడిని ఏర్పాటు చేసేందుకు చైనా స‌న్నాహాలు మొద‌లుబెట్టింది. 10 నుంచి 80 కిలోమీట‌ర్ల వ‌ర‌కు విద్యుద్దీపాల అవ‌స‌రం లేకుండా ఆ కృత్రిమ చంద్రుడితో వెలుగులు నింపాల‌ని చైనా భావిస్తోంది.

చెంగ్డు ఏరోస్పేస్ అండ్ టెక్నాల‌జీ మైక్రో ఎల‌క్ట్రానిక్స్ సిస్ట‌మ్ రిసెర్చ్ ఇన్ స్టిట్యూట్ కో(సీఎఎస్సీ) చైర్మ‌న్ వూ చున్ ఫెంగ్ ఈ విష‌యాన్ని వెల్ల‌డించారు. వాస్త‌వానికి ఈ ఐడియా చైనాది కాద‌ట‌. కాంతిని ప్ర‌తిబింబించేలా అద్దాల‌ను ఏర్పాటు చేసే ఐడియాను చైనాలో 2010లో ఓ కార్య‌క్ర‌మం సంద‌ర్భంగా ఓ ఫ్రెంచ్ ఆర్టిస్ట్ ఇచ్చాడ‌ట‌. ఇన్నాళ్లూ ప‌రిశోధ‌న‌లు చేసిన త‌ర్వాత దానిపై ఓ అంచనాకు వ‌చ్చార‌ట‌. ఒరిజిన‌ల్ చంద్రుడికి 8 రెట్లు వెలుగులు విర‌జిమ్మేలా దానిని శాటిలైట్ కోట్ ఉన్న మెటీరియ‌ల్ తో ఏర్పాటు చేస్తార‌ట‌. దాని ఏర్పాటుతో చెంగ్డు న‌గ‌రంలో విద్యుద్దీపాల అవ‌స‌రం ఉండ‌ద‌ని సీఎఎస్సీ చెబుతోంది. మ‌రి, ప్రాక్టిక‌ల్ గా ఆ కృత్రిమ చంద్రుడు ఎంత‌వ‌ర‌కు వెలుగులు విర‌జిమ్ముతాడో చూడాలంటే 2020వ‌ర‌కు వేచిచూడ‌క త‌ప్ప‌దు.