భాయ్ ధూజ్ స్పెషల్.. అరుదైన ఫొటో షేర్ చేసిన ప్రియాంక

కాంగ్రెస్ నాయకురాలు ప్రియాంక గాంధీ వాద్ర గురించి ప్రత్యేకంగా చెప్పనక్కర్లేదు. గతకొంత కాలం నుంచి రాజకీయాల్లో ఈమె చురుగ్గా పాల్గొంటున్నారు. ఉత్తరాదిన ప్రియాంక తనదైన రీతిలో మంచి పేరు తెచ్చుకుంటున్నారు. అచ్చం దివంగత మాజీ ప్రధాని ఇందిరా గాంధీ పోలికలతో ఉన్న ప్రియాంక ఉత్తరాది ప్రజల మన్ననలు పొందుతున్నారు. వరుస పర్యటనలతో ప్రజలతో మమేకం అవుతున్నారు. అంతేకాకుండా కేంద్ర ప్రభుత్వంపై ఈమె పదునైన విమర్శలు గుప్పించడంలో దిట్ట. రాజకీయాల విషయం అటు ఉంచితే... ప్రియాంక తాజాగా ఓ అరుదైన ఫొటోను తన ట్విట్టర్ ఖాతా ద్వారా పంచుకున్నారు. ప్రియాంక గాంధీ, ఆమె సోదరుడు రాహుల్ గాంధీ నవ్వులు చిందిస్తూ ఉన్న పిక్ ని షేర్ చేశారు.


తోబుట్టువులకు సంబంధించి ఉత్తరాధి ప్రజలు ఘనంగా జరుపుకునే పండుగల్లో ఒకటి భాయ్ దూజ్. ఈ పండుగను అక్కడ సోదరసోదరీమణులు చాలా గ్రాండ్ గా జరుపుకుంటారు. ఈ సందర్భంగా కాంగ్రెస్ నేత ప్రియాంక గాంధీ కూడా ఓ అపురూప చిత్రాన్ని ట్వీట్ చేశారు. ప్రజలకు భాయ్ దూజ్ శుభాకాంక్షలు తెలుపుతూ ఈ పిక్ ని నెటిజన్లతో పంచుకున్నారు. తన సోదరులు ప్రేమ, ధైర్యంతో పోరాడుతున్నారని ఆమె పేర్కొన్నారు. వారు సత్యం కోసం పోరాడడం తనకు చాలా గర్వంగా ఉందని అభిప్రాయపడ్డారు. ఇక షూటింగ్ లో మెడల్స్ సంపాదించినప్పటి ఫొటోను ఆమె షేర్ చేశారు.

'నా సోదరులు ప్రేమ, ధైర్యంతో... సత్యం కోసం పోరాడుతున్నారు. అందుకు నాకు చాలా గర్వంగా ఉంది. భాయ్ ధూజ్ సందర్భంగా అందరికీ శుభాకాంక్షలు. ఇది షూటింగ్ లో మెడల్స్ సంపాదించినప్పుడు తీసుకున్న ఫొటో.'

-కాంగ్రెస్ నేత ప్రియాంక

ప్రియాంక షేర్ చేసిన ఈ ఫొటో ప్రస్తుతం సోషల్ మీడియాలో వైరల్ గా మారింది. మెడల్స్ సాధించిన సందర్భంగా తమ సోదరుడు రాహుల్ గాంధీతో కలిసి ఉన్నప్పటి ఫొటోను ఆమె షేర్ చేశారు. అయితే ఈ ఫొటోకు నెటిజన్ల నుంచి మంచి స్పందన వస్తోంది. రాహుల్ గాంధీ, ప్రియాంక గాంధీ వాద్రా ఇద్దరు కూడా నవ్వులు చిందిస్తూ ఉన్న ఆ ఫొటోను మీరూ ఓ సారి చూసేయండి మరి..!