కరోనాకు యాంటీబాడీస్ చికిత్స..భారత్ బయోటెక్ విజయం

ప్రాణాలు తీస్తున్న కరోనా వైరస్ ను అరికట్టడానికి అగ్రరాజ్యం అమెరికా సహా ప్రపంచ దేశాలన్నీ విస్తృత పరిశోధనలు చేస్తున్నాయి. ఇప్పటికే చాలా దేశాల్లో క్లినికల్ ట్రయల్స్ నడుస్తున్నాయి. వ్యాక్సిన్ రావడానికి మరో ఏడాది పడుతుందని చెబుతున్నారు.

ఈ నేపథ్యంలోనే భారత్ లోని హైదరాబాద్ కు చెందిన ‘భారత్ బయోటెక్’ ఫార్మా కంపెనీ అద్భుతం చేసింది. ‘హ్యుమన్-మోనో క్లోనల్ యాంటీబాడీస్’ చికిత్సను అభివృద్ధి చేసింది. భారత్ బయోటెక్ ప్రాజెక్టుకు సీఎస్ఐఆర్ అనుమతి మంజూరు చేసింది.

భారత్ బయోటెక్ చేపట్టిన ప్రాజెక్టులో పుణెలోని నేషనల్ సెంటర్ ఫర్ సెల్ సైన్సెస్, ఐఐటీ-ఇండోర్, గురుగ్రామ్ కు చెందిన ప్రిడోమిక్స్ టెక్నాలజీస్ భాగస్వాములుగా పనిచేస్తున్నాయి.

కరోనాకు ఔషధాలు, వ్యాక్సిన్ లేని సమయంలో ప్రత్మామ్మాయ చికిత్స విధానాలు అవసరమని.. అందుకే తాము తయారు చేశామని భారత్ బయోటెక్ తెలిపింది. ఈ చికిత్సతో కరోనా వైరస్ ను నిర్వీర్యం చేయడంతోపాటు వ్యాధి వ్యాప్తిని అడ్డుకోవడంలో ఈ తరహా చికిత్స సత్ఫలితాలు ఇస్తుందని సంస్థ పేర్కొంది. వ్యాధి బారిన పడ్డ వారికి ఈ చికిత్స సరైన పరిష్కారం అవుతుందని సంస్థ సీఎండీ కృష్ణ ఎల్ల తెలిపారు.

కరోనాను నాశనం చేసే ఈ యాంటీ బాడీల మిశ్రమాన్ని ఆవిష్కరించే పనిలో ఉన్నామని భారత్ బయోటెక్ తెలిపింది. రాబోయే 6నెలల్లో ఈ చికిత్స అందుబాటులోకి తెస్తామన్నారు. ఇదే కరోనాకు తొలి చికిత్స అవుతుందని ఆశాభావం వ్యక్తం చేశారు.

ఇక ఇదే భారత్ బయోటికె అమెరికాలోని మాడిసన్ లో గల విస్కాన్ యూనివర్సిటీ పరిశోధకులతో కలిసి కరోనా వ్యాక్సిన్ ను తయారు చేస్తోంది.