కేటీఆర్ కు బ‌ర్త్ డే విషెస్ వెల్లువ!

ప్ర‌స్తుతం రెండు తెలుగు రాష్ట్రాల్లో ఉన్న యంగ్ అండ్ డైన‌మిక్ లీడ‌ర్స్ లో తెలంగాణ ఐటీ శాఖ మంత్రి కేటీఆర్ ఒక‌రు. తండ్రికి త‌గ్గ త‌న‌యుడిగా రాజ‌కీయాల్లో దూసుకుపోతోన్న కేటీఆర్....త‌న‌కంటూ ఓ ప్ర‌త్యేక‌మైన గుర్తింపు సంపాదించుకున్నారు. టెక్నాల‌జీని వాడుకుంటూ సోష‌ల్ మీడియాలో ప్ర‌జ‌ల‌కు అందుబాటులో ఉంటోన్న కేటీఆర్ కు యువ‌త‌తో పాటు ల‌క్ష‌లాదిమంది ఫాలోవ‌ర్లున్నారు. ఇక సినీ తార‌ల నుంచి వ్యాపార వేత్త‌ల వ‌ర‌కు చాలామంది కేటీఆర్ తో చాలా స‌న్నిహితంగా ఉంటారు. దాదాపుగా అన్ని రంగాల్లో మిత్రులను సంపాదించుకున్న కేటీఆర్....కేసీఆర్ వార‌సుడిగా తెలంగాణ రాజ‌కీయాల‌పై త‌న‌దైన ముద్ర వేశారు. తాజాగా, ఈ యువ రాజ‌కీయవేత్త నేడు 42 వ పుట్టిన‌రోజు జ‌రుపుకుంటున్నారు. ఈ సంద‌ర్భంగా కేటీఆర్ కు టాలీవుడ్ ప్రిన్స్ మ‌హేష్ బాబు జ‌న్మ‌దిన శుభాకాంక్ష‌లు తెలుపుతూ ట్వీట్ చేశారు. మ‌హేష్ తో పాటు తెలంగాణ నీటిపారుద‌ల శాఖ మంత్రి టీ. హ‌రీష్ రావు - టీపీసీసీ అధ్య‌క్షుడు ఉత్త‌మ్ కుమార్ రెడ్డి కూడా కేటీఆర్ కు బ‌ర్త్ డే విషెస్ తెలిపారు.

కేటీఆర్ తో మ‌హేష్ బాబుకు మంచి సాన్నిహిత్యం ఉన్న సంగ‌తి తెలిసిందే. `భ‌ర‌త్ అనే నేను` చిత్రం విడుద‌ల త‌ర్వాత కొంత‌మంది యువ‌త‌తో ఏర్పాటు చేసిన కార్య‌క్ర‌మంలో వీరిద్ద‌రూ సంద‌డి చేసిన విష‌యం విదిత‌మే. కేటీఆర్ కు మ‌హేష్ మంచి స్నేహితుడు కూడా. ఈ నేప‌థ్యంలోనే కేటీఆర్ కు ప్రిన్స బ‌ర్త్ డే విషెస్ తెలిపారు. 'మంచి స్నేహితుడు - గొప్ప నాయకుడు. మంచి మ‌న‌సున్న మ‌నిషి. హ్యాపీ బర్త్ డే కేటీఆర్' అంటూ మ‌హేష్ ట్వీట్ చేశారు. కేటీఆర్ బావ హ‌రీష్ కూడా బ‌ర్త్ డే విషెస్ చెప్పారు. ``స‌మ‌ర్థుడైన‌ - క‌ష్ట‌ప‌డేత‌త్వం ఉన్న మ‌న నాయ‌కుడు కేటీఆర్ కు జ‌న్మ‌దిన శుభాకాంక్ష‌లు`` అంటూ హ‌రీష్ ట్వీట్ చేశారు. దానికి కేటీఆర్....`థ్యాంక్స్ బావా``అంటూ రీట్వీట్ చేశారు. మ‌రోవైపు, త‌మ మ‌ధ్య ఉన్న రాజ‌కీయ విభేదాల‌ను ప‌క్క‌కు పెట్టి మ‌రీ ....టీపీసీసీ అధ్యక్షుడు ఉత్తమ్ కుమార్ రెడ్డి ..... కేటీఆర్ కు శుభాకాంక్షలు తెలిపారు. '42వ జన్మదినం సందర్భంగా కేటీఆర్ కు నా బెస్ట్ విషెస్. ఆయనకు మంచి ఆరోగ్యం - దీర్ఘాయుష్షు ఉండాలని కోరుకుంటున్నా' అంటూ ఉత్త‌మ్ ట్వీట్ చేశారు. ఏపీ మంత్రి నారా లోకేష్ కూడా కేటీఆర్ కు బ‌ర్త్ డే విషెస్ చెబుతూ ట్వీట్ చేశారు. ``జ‌న్మ‌దిన శుభాకాంక్ష‌లు కేటీఆర్. ఈ పుట్టిన రోజు నాడు ప్ర‌తీ క్ష‌ణం సంతోషంగా, ఉల్లాసంగా గ‌డ‌పాల‌ని కోరుకుంటున్నా``అని లోకేష్ ట్వీట్ చేశారు. వీరితోపాటు, ప‌లువురు టాలీవుడ్ ప్ర‌ముఖులు కూడా కేటీఆర్ కు బ‌ర్త్ డే విషెస్ చెప్పారు. శోభు యార్ల‌గ‌డ్డ‌ - దేవీ శ్రీ ప్ర‌సాద్ - కోన వెంక‌ట్ - హ‌రీశ్ శంక‌ర్ - వంశీ పైడిప‌ల్లి - బీవీఎస్ ర‌వి - గోపీచంద్ మ‌లినేని - మంచు ల‌క్ష్మి - మంచు విష్ణు - ఈషా రెబ్బా - వెన్నెల కిషోర్ త‌దిత‌రులు కేటీఆర్ కు ట్వీట్ చేశారు.