ఈవీఎం హ్యాకింగ్.. చిక్కుల్లో కిషన్ రెడ్డి

ఊహించని విధంగా విపరీత చిక్కుల్లో చిక్కుకున్నారు బీజేపీ నేత కిషన్ రెడ్డి. ఈవీఎం హ్యాకింగ్ వివాదానికి సంబంధించి కిషన్ రెడ్డిపై తీవ్ర ఆరోపణలు చేశారు సయ్యద్ సూజా అనే వ్యక్తి. తనకుతాను సైబర్ నిపుణుడిగా చెప్పుకునే ఈ వ్యక్తి ప్రస్తుతం అమెరికాలో ఉంటున్నాడు. 2014 ఎన్నికల్లో ఎలక్ట్రానిక్ ఓటింగ్ మెషీన్లు హ్యాక్ అయ్యాయని - అందువల్లే బీజేపీ అధికారంలోకి వచ్చిందని సయ్యద్ ఆరోపించారు. ఈ హ్యాకింగ్ కు సంబంధించి కిషన్ రెడ్డికి అన్ని విషయాలు తెలుసంటున్నాడు సయ్యద్.

ఈవీఎం డిజైనింగ్ - తయారీకి సంబంధించిన టీమ్ లో సయ్యద్ ఓ సభ్యుడు. ఈసీఐఎల్ లో ఈ ఈవీఎంలు తయారయ్యాయి. ప్రకాష్ - కేశవ్ - వంశీ - అంజాస్ తో కలిసి తను కూడా ఈవీఎం డిజైనింగ్ - మేకింగ్ లో పాలుపంచుకున్నానని తెలిపిన సయ్యద్.. 2014 లోక్ సభ ఎన్నికల సమయంలో తన టీమ్ సభ్యులు హత్యకు గురవ్వడంతో భయపడి తను అమెరికాకు పారిపోయానని వెల్లడించాడు. లండన్ లో జరిగిన ఓ ప్రెస్ మీట్ లో ఈ విషయాలు బయటపెట్టాడు సయ్యద్.

పోలింగ్ ముగిసిన తర్వాత - ఫలితాల వెల్లడికి కొన్ని రోజుల ముందు తన టీమ్ సభ్యుల్ని కిషన్ రెడ్డి చంపించారని సయ్యద్ ఆరోపిస్తున్నాడు. గన్ మెన్స్ కు చెప్పి తన టీమ్ సభ్యుల్ని కిషన్ రెడ్డి కాల్చిచంపించారనేది సయ్యద్ ఆరోపణ.

ఈ ఆరోపణల్ని కిషన్ రెడ్డి ఖండించారు. సయ్యద్ ఆరోపణల్లో నిజం లేదంటున్న కిషన్ రెడ్డి.. ఆ సమయంలో కాంగ్రెస్ ప్రభుత్వం నడుస్తోందని అన్నారు. నిజంగా తను హ్యాకింగ్ కు పాల్పడినట్టయితే - తెలంగాణ ముఖ్యమంత్రిని అయ్యేవాడినని అన్నారు.