స్నానం చేసినా నువ్వు దున్నలాగే ఉంటావ్ కుమారస్వామి'

కర్ణాటకలో రాజకీయ విమర్శలు హద్దు మీరాయి. పరస్పర విమర్శల విషయంలో నేతలు హద్దు మీరారు. తమకు ఇష్టం వచ్చినట్టుగా మాట్లాడుతున్నారు. ఇప్పటికే అక్కడ వ్యక్తిగత విమర్శలకు కూడా నేతలు వెనుకాడలేదు. ఇలాంటి నేపథ్యంలో బీజేపీ మాజీ ఎమ్మెల్యే ఒకరు చేసిన వ్యాఖ్యలు మరింత తీవ్రంగా ఉన్నాయి.

కర్ణాటక ముఖ్యమంత్రి కుమారస్వామిని ఉద్దేశించి తీవ్రమైన వ్యాఖ్యలు చేశారు బీజేపీ నేత రాజు కగే. ఈయన చేసిన వ్యాఖ్యలను ప్రస్తావించడానికి ముందు కుమారస్వామి చేసిన కొన్ని వ్యాఖ్యలను గుర్తు చేయాలి. ఆ మధ్య కుమారస్వామి మాట్లాడుతూ.. మోడీ మీద ధ్వజమెత్తారు.

మోడీ ఎప్పుడూ మేకప్ కిట్ ను వెంట పెట్టుకుని ఉంటారని, మేకప్ వేసుకుంటూ ఎప్పటికప్పుడు ఫ్రెష్ గా కనిపిస్తూ ఉంటారని కుమారస్వామి వ్యాఖ్యానించారు. ఆ మాటలపై బీజేపీ నేత రాజు స్పందిస్తూ… కుమారస్వామిపై తీవ్ర వ్యాఖ్యలు చేశారు.

'మోడీ చాలా ఫెయిర్ గా ఉంటారు. అందుకే ఆయన ఎప్పుడూ ఫ్రెష్ గా కనిపిస్తారు. కుమారస్వామి రోజుకు వంద సార్లు స్నానం చేసినా.. దున్నపోతులాగానే కనిపిస్తారు..' అంటూ రాజు కగే తీవ్ర వ్యాఖ్యలు చేశారు.
ఆఖరికి రాజకీయ నేతలు ఇలా ‘దున్నపోతు’ అని తిట్టుకునేంత వరకూ వచ్చారు. వీళ్లు ఇంకా ఎక్కడి వరకూ దిగజారతారో చూస్తూ ఉండాలంతే!