శవమై దొరికిన శ్రీహర్ష.. కారణమేంటి?

ఖమ్మం జిల్లాకు చెందిన బీజేపీ జిల్లా అధ్యక్షుడు ఉదయ్ ప్రతాప్ కుమారుడు శ్రీహర్ష లండన్ లో అదృశ్యమైన సంగతి తెలిసిందే. ఈ కేసులో చిక్కుముడి వీడింది. పోలీసులు 12 రోజులుగా మిస్సింగ్ కేసు నమోదు చేసి శ్రీహర్ష కోసం గాలిస్తున్నారు. వారం క్రితమే కొడుకు ఆచూకీ కోసం శ్రీహర్ష తల్లిదండ్రులు కూడా లండన్ వెళ్లారు. అయితే తాజాగా లండన్ బీచ్ లో శ్రీహర్ష మృతదేహాన్ని పోలీసులు గుర్తించారు. కొట్టుకువచ్చిన డెడ్ బాడ శ్రీహర్షదే అని తేల్చారు. దీంతో సొంతూరు ఖమ్మంలోని శ్రీహర్ష ఇంట్లో విషాదం అలుముకుంది.

లండన్ లో ప్రస్తుతం శ్రీహర్ష పీజీ కోర్సు చదువుతున్నాడు. చదువులో చాలా ముందుండేవాడని తోటి స్నేహితులు చెబుతున్నారు. కాలేజీకి రెగ్యులర్ గా వచ్చేవాడని తెలిపారు.

అయితే లండన్ బీచ్ లో శవమై తేలిన శ్రీహర్ష మృతదేహాన్ని పోలీసులు పోస్టుమార్టం పంపించారు. శ్రీహర్ష ఆత్మహత్య చేసుకున్నాడా? లేక హత్యచేసి ఉంటారా అన్న కోణంలో పోలీసులు విచారణ చేస్తున్నట్టు సమాచారం.

లండన్ లోని స్థానిక బీచ్ వద్ద శ్రీహర్ష ల్యాప్ టాప్, ఇతర వస్తువులను పోలీసులు గుర్తించి స్వాధీనం చేసుకున్నారు. అందులో తన తల్లిదండ్రుల గురించి రాసిన ఓ లేఖను కనుగొన్నారు. ఈ నేపథ్యంలో ఇతడి మృతిపై పోలీసులు అనుమానాలు వ్యక్తం చేస్తూ దర్యాప్తు చేస్తున్నారు.

కాగా శ్రీహర్ష డెడ్ బాడీ దొరకడంతో ఖమ్మం జిల్లా బీజేపీ అధ్యక్షుడు ఉదయ్ ప్రతాప్ కన్నీరుమున్నీరయ్యారు. ప్రస్తుతం లండన్ లో ఉన్న శ్రీహర్ష తండ్రి, తల్లి ఫ్యామిలీ మెంబర్స్ చదువుకొని బాగుపడుతాడనుకుంటే శ్రీహర్ష శవమై వస్తాడని ఊహించలేదని భోరుమన్నారు.