అనుష్కకు విడాకులివ్వు విరాట్ కోహ్లీ: బీజేపీ ఎమ్మెల్యే

భారత క్రికెట్ జట్టు కెప్టెన్ విరాట్ కోహ్లీ భార్య, ప్రముఖ బాలీవుడ్ హీరోయిన్ అనుష్కశర్మపై బీజేపీ ఎమ్మెల్యే నందకిశోర్ గుర్జర్ పోలీసులకు ఫిర్యాదు చేశారు. ఇటీవల అనుష్కశర్మ నిర్మాతగా తీసిన వెబ్ సిరీస్ ‘పాతాళ్ లోక్’ అమేజాన్ ప్రైమ్ లో రిలీజ్ అయ్యింది. ఇందులోని ఓ సీన్ లో నంది కిషోర్ ఫొటోను ఆయన అనుమతి లేకుండా ఉపయోగించారని అనుష్కపై బీజేపీ ఎమ్మెల్యే కేసు పెట్టారు.

అంతటితో ఆగకుండా ఈ వెబ్ సిరీస్ మతవిద్వేశాలు రెచ్చగొట్టేలా ఉందని.. జాతీయ భద్రతా చట్టం కింద కేసు ఫైల్ చేయాలని.. వెబ్ సిరీస్ ను బ్యాన్ చేయాలని ఆయన కేంద్ర సమాచార ప్రసార శాఖ మంత్రి ప్రకాష్ జవదేకర్ కు ఎమ్మెల్యే గుర్జర్ లేఖ రాశారు.

ఈ సందర్భంగా బీజేపీ ఎమ్మెల్యే గుర్జర్ తాజాగా అనుష్కపై ఘాటైన వ్యాఖ్యలు చేశారు. అనుష్క దేశ ద్రోహీ అని.. విరాట్ కోహ్లీకి దేశం అంటే అపారమైన భక్తి ఉందని.. ఇండియా తరుఫున ఆడే కోహ్లీ వెంటనే అనుష్కకు విడాకులు ఇవ్వాలని సంచలన వ్యాఖ్యలు చేశారు.

ఇక పాతాళ్ లోక్ సిరీస్ పై ఇప్పటికే గోర్ఖా వారు తీవ్ర స్థాయిలో మండిపడుతున్నారు. ఓ సీన్ లో గోర్ఖా వర్గాన్ని కించపరిచేలా డైలాగ్స్ ఉన్నాయంటూ గోర్ఖా సంఘాలు అభ్యంతరం తెలిపాయి. మానవ హక్కుల సంఘానికి ఫిర్యాదు చేశాయి. ఇప్పుడు తాజాగా బీజేపీ ఎమ్మెల్యే సైతం అనుష్కపై పోలీసులకు ఫిర్యాదు చేశారు.