గుళ్లలో భజనల కోసం బీజేపీ ఎంపీ రూ.5 కోట్లు కేటాయింపు.. దుమారం

ఉత్తరప్రదేశ్ లోని బల్లియా నియోజకవర్గ బీజేపీ ఎంపీ వీరేంద్ర సింగ్ మస్త్ తీసుకున్న నిర్ణయం పెనుదుమారం రేపింది. దేశంలోని ఏ ఎంపీ అయినా అభివృద్ధి కోసం తన నిధులు ఖర్చు చేస్తారు. కానీ వీరేంద్రసింగ్ తన ఎంపీల్యాండ్స్ రూ.5 కోట్ల నిధిని దేవాలయాల వద్ద "భజన-కీర్తనలు" నిర్వహించడానికి ఉపయోగించాలని అధికారులను ఆదేశించారు. ఇది నియోజకవర్గ స్థాయిలో అభివృద్ధి పనుల కోసం ఉద్దేశించిన నిధి. దీన్ని అసాధారణంగా ఉపయోగించడం వివాదాస్పదమైంది. పైగా "ఆధ్యాత్మిక మేల్కొలుపు" కోసం తాను ఈ నిర్ణయం తీసుకున్నట్లు అధికార పార్టీ ఎంపీ చెప్పడం రాజకీయంగా విమర్శలకు దారితీసింది..

బల్లియా జిల్లాలోని మునిసిపల్ కౌన్సిల్ ప్రాంతంలో ఉన్న అన్ని "చిన్న , పెద్ద దేవాలయాలను" సర్వే చేయాలని.. "భజన-కీర్తన" భక్తి గీతాలు , సంగీత వాయిద్యాలను కొనుగోలు చేయడానికి ఏర్పాట్లు చేయాలని బీజేపీ ఎంపీ ఆదేశించినట్లు జిల్లా సమాచార శాఖ తెలిపింది.

ఆలయాలకు భజన కీర్తనలు నిర్వహించడంలో, సంగీత వాయిద్యాల ఏర్పాటులో సమస్య ఉంటే తన పార్లమెంటు సభ్యుల స్థానిక ప్రాంత అభివృద్ధి పథకం (ఎంపిఎల్‌ఎడి) నిధిని ఉపయోగించవచ్చని రాజకీయ నాయకుడు ఆదివారం జిల్లా అధికారులకు ఇచ్చిన ఆదేశంలో తెలిపారు.

ఎంపీ ల్యాండ్స్ కింద, ఎంపీల వద్ద ప్రతి సంవత్సరం ₹ 5 కోట్లు ఉంటాయి. నిధులు వెచ్చించాల్సిన అభివృద్ధి కార్యక్రమాలను జిల్లా కలెక్టర్‌కు సూచిస్తున్నారు.

అభివృద్ధి పనులకు కేటాయించాల్సిన ఈ నిధులను భజనకు కేటాయించడం దుమారం రేపింది. అవసరమైన నిధులను ఉపయోగించడంపై ఎంపీలు మార్గదర్శకాలను అనుసరించాలి. ఉదాహరణకు ఎంపీలు తరచుగా రోడ్లు, పాఠశాలలు ,క్లినిక్‌లు నిర్మించడం వంటి ప్రాజెక్టులలో ఈ ఎంపీ నిధులను ఉపయోగిస్తారు.

నాలుగు పర్యాయాలు లోక్‌సభ ఎంపీ అయిన బీజేపీ నేత మస్త్, రోజుకు రెండుసార్లు ప్రార్థనలు చేసే లోతైన మతపరమైన వ్యక్తి అని సమాచారం. తన నిర్ణయాన్ని వివరిస్తూ.. ప్రస్తుత పరిస్థితుల్లో సంప్రదాయ విలువలు కనుమరుగవుతున్నాయి. కాబట్టి "భజనలు" మరియు "కీర్తనలు" వాటికి సంగీత వాయిద్యాలను ఉపయోగించడం వల్ల సాంస్కృతిక , మతపరమైన కార్యకలాపాలు పెరుగుతాయని ఆయన వాదించారు. ఇది "ఆధ్యాత్మిక సంచేతన" లేదా ఆధ్యాత్మిక మేల్కొలుపును సృష్టిస్తుందని ఆయన సమర్థించుకున్నారు.

ఎంపీ కృషిని బల్లియాలోని భృగు దేవాలయం మేనేజింగ్ కమిటీ చైర్మన్ శివకుమార్ మిశ్రా అభినందించారు. ఆలయాల సర్వే త్వరలో ప్రారంభమవుతుందని బల్లియా నగర్ పాలికా ఎగ్జిక్యూటివ్ ఆఫీసర్ సత్య ప్రకాశ్ సింగ్ సోమవారం తెలిపారు. బల్లియాలో యోగి ఆదిత్యనాథ్ ప్రభుత్వం భృగు మహర్షికి అంకితం చేసిన కారిడార్‌ను నిర్మిస్తోందని ఎంపీ చెప్పారు.

ఇలా అభివృద్ధిని పక్కనపెట్టి బీజేపీ నేతలు హిందుత్వం, భజనలు చేస్తూ ప్రజలను మభ్యపెడుతున్నారని పలువురు ఆరోపిస్తున్నారు.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.