అల్లు అర్జున్, కళ్యాణ్ రామ్ లకు షాకిచ్చిన పోలీసులు

రోడ్డు ప్రమాదాలను నివారించడం కోసం పోలీసులు అన్ని విధాలుగా ప్రయత్నాలు చేస్తున్నప్పటికీ వర్కవుట్ కావడం లేదు. కొందరు వాహనాలపై ఫేక్ స్టిక్కర్లు వేసుకొని రోడ్లపై ట్రాఫిక్ రూల్స్ పాటించకుండా ఇష్టారీతిన తిరుగుతున్నారు. వీరికి చెక్ పెట్టేందుకు ట్రాఫిక్ పోలీసులు ప్రత్యేక డ్రైవ్ నిర్వహిస్తున్నారు. కార్లకు నకిలీ స్టిక్కర్లు, ఎమ్మెల్యే స్టిక్కర్లు, బ్లాక్ ఫిల్ములతో తిరుగుతున్న వారిని గుర్తించి వారికి చలానాలు విధిస్తున్నారు.

ఈ క్రమంలోనే హైదరాబాద్ ఖైరతాబాద్ పరిధిలో ఫిలింనగర్ కూడలి, జూబ్లిహిల్స్ చెక్ పోస్టు సహా చాలా ప్రాంతాల్లో శనివారం ట్రాఫిక్ పోలీసులు స్పెషల్ డ్రైవ్ లు చేపట్టారు. ఈ నేపథ్యంలోనే సినీ నటులు అల్లు అర్జున్, కల్యాణ్ రామ్ ల కార్లను జూబ్లీహిల్స్ ట్రాఫిక్ పోలీసులు ఆపి తనిఖీ చేశారు. ఈ సందర్భంగా కారు విండోలకు బ్లాక్ ఫిల్మ్ తొలగించి చలాన్లు కూడా విధించారు.

జూబ్లీహిల్స్ ట్రాఫిక్ ఎస్సై శ్రీధర్ శనివారం రోడ్డు నంబర్ 36లోని నీరూస్ కూడలిలో తనిఖీలు నిర్వహించారు. ఈ సందర్భంగా అల్లు అర్జున్, కల్యాణ్ రామ్ తమ కార్లలో అటుగా వెళుతుండగా ఆపామని.. కార్ల అద్దాలకు ఉన్న బ్లాక్ ఫిల్ములను తొలగించి రూ.700 చొప్పున చలాన్లు విధించినట్టు తెలిపారు.

ఇక బ్లాక్ ఫిల్ముతోపాటు ఇతర నిబంధనలు పాటించని 80కి పైగా వాహనాలపై కేసు నమోదు చేసినట్టు వెల్లడించారు. వారం కింద కూడా తనిఖీల్లో భాగంగా సినీ నటుడు జూనియర్ ఎన్టీఆర్ కు చెందిన కారుకు బ్లాక్ ఫిల్మ్ ఉండడంతో వాహనాన్ని ఆపి దాన్ని తొలగించి ఫైన్ వేశారు.