బంగీ జంప్ తో అదరగొట్టేసిన బొండా ఉమ

ప్రత్యర్థులపై హాట్ హాట్ వ్యాఖ్యలతో తొలిసారి ఎమ్మెల్యే అన్న ఫీలింగ్ కలుగకుండా ఏపీలోనే కాదు.. తెలంగాణ రాష్ట్ర ప్రజలకు సుపరిచితులుగా మారారు విజయవాడ సెంట్రల్ మాజీ ఎమ్మెల్యే బొండా ఉమ. దూకుడుగా వ్యవహరించటం.. అంతకు మించిన తీరును ప్రదర్శించటం ఒక ఎత్తు అయితే.. తండ్రికి ఏ మాత్రం తగ్గని రీతిలో బొండా ఉమ కుమారుడు పుణ్యమా అని బొండా ఉమ తరచూ మీడియాలోనూ.. ప్రజల నోళ్లల్లోనూ నానుతున్న పరిస్థితి.

ఇటీవల జరిగిన ఎన్నికల్లో ఓడిన బొండా ఉమ.. పార్టీ మారే ఆలోచనలో ఉన్నట్లు చెబుతున్నారు. టీడీపీకి గుడ్ బై చెప్పేసి.. బీజేపీలో చేరే దిశగా ఆయన పావులు కదుపుతున్నట్లుగా వార్తలు వస్తున్నాయి. దీనిపై ఎలాంటి వ్యాఖ్యలు చేయని ఆయన.. తాజాగా ఆసక్తికర అంశంతో వార్తల్లోకి వచ్చారు. రాజకీయ నేతల్లో చాలా అరుదుగా ఉండే రియల్ సాహసాన్ని ఆయన ప్రదర్శించారు. నడి వయసులో ఉన్న ఒక రాజకీయ నేత బంగీ జంప్ చేయటం మామూలు విషయం కాదు.

రోటీన్ కు భిన్నంగా బంగీ జంప్ చేసిన బొండా ఉమ.. అందుకు సంబంధించిన వీడియోను తన సోషల్ మీడియా ఖాతాలో పోస్ట్ చేశారు. వైరల్ గా మారిన ఈ వీడియోలో బంగీజంప్ చేయటానికి ఆయన ప్రదర్శించిన సాహసం ఆకట్టుకుంటోంది. ప్రస్తుతం న్యూజిలాండ్ వెకేషన్ లో ఉన్న ఆయన.. తన బంగీ జంప్ వీడియోను పోస్ట్ చేస్తూ.. జీవితాన్ని సాహసవంతమైన క్రీడగా అభివర్ణించిన బొండా.. తాను సాహసం చేసేందుకు మొగ్గానని పేర్కొంటూ తన బంగీజంప్ వీడియోను పోస్ట్ చేశారు. బంగీ జంప్ సరే.. పార్టీ నుంచి జంప్ అయ్యే విషయంలో బొండా ఎలాంటి నిర్ణయం తీసుకుంటారో చూడాలి.