ఏపీ పుష్కర ముగింపులో బోయిపాటి మార్క్..?

గోదావరి పుష్కరాల ప్రారంభానికి ముందు రోజు రాత్రి నిర్వహించిన గోదావరి హారతికి ప్రముఖ సినీ దర్శకులు బోయపాటి శ్రీను ఏర్పాట్లు చేయటం.. పలువురు ప్రశంసలు అందుకోవటం తెలిసిందే. అయితే.. గోదావరి పుష్కరాల ప్రారంభం రోజున రాజమండ్రిలో చోటు చేసుకున్న తొక్కిసలాటలో 27 మంది మరణించటం.. దీనికి బోయపాటి శ్రీను కూడా కారణం అంటూ పెద్ద ఎత్తున విమర్శలు చెలరేగాయి.

అయితే.. పుష్కరాల ముందు రోజు రాత్రి నిర్వహించిన గోదావరి హారతికి మాత్రమే తాను ఏర్పాట్లు చూశాను తప్పించి.. ఆ తర్వాత రోజుతో తనకు సంబంధం లేదని బోయపాటి ఇప్పటికే వివరణ ఇవ్వటం తెలిసిందే. ఏది ఏమైనా.. గోదావరి పుష్కరాలలో చోటు చేసుకున్న తొక్కిసలాటలో బోయపాటి ఏర్పాట్లు కూడా కారణమన్న మరక మాత్రం ఆయనపై పడింది. నిజానికి ఆయనకు సంబంధం లేకున్నా.. జనాల్లో అలాంటి భావన చోటు చేసుకుంది.

విమర్శల సంగతి ఎలా ఉన్నా.. ఏపీలో నిర్వహించే గోదావరి ముగింపు ఉత్సావాల్లో మరోసారి బోయపాటి మార్క్ కనిపించనుంది. ఈ విషయాన్ని తెలుగుదేశం పార్టీ ఎంపీ.. సీనీ నటుడు మురళీమోహన్ తాజాగా వెల్లడించారు.

ఈ నెల 25న నిర్వహించే గోదావరి పుష్కరాల ముగింపు ఉత్సావాల్ని ఘనంగా నిర్వహిస్తామని.. ఆ ఏర్పాట్లను బోయపాటి శ్రీను పర్యవేక్షిస్తారని చెప్పారు. ఇందుకోసం గురువారమే బోయపాటి రాజమండ్రికి చేరుకోనున్నారు. విమర్శల సంగతి ఎలా ఉన్నా.. గోదావరి పుష్కరాల ముగింపు ఏర్పాట్లు బోయపాటి శ్రీను పర్యవేక్షణలో సాగనున్నాయి. మరి.. బోయపాటి మార్క్ ఏ రేంజ్ లో ఉంటుందో.. గోదావరి ముగింపు ఉత్సవాలు చూస్తే కానీ తెలీదు.