‘హెలికాప్టర్​ కొనివ్వండి’.. రాష్ట్రపతికి మహిళా రైతు లేఖ..! ఎందుకో తెలిస్తే షాకే

హెలికాప్టర్​ కొనిపెట్టండి సారూ.. అంటూ ఓ మహిళా రైతు నేరుగా రాష్ట్రపతికి లేఖ రాసింది. ఇప్పుడీ లేఖ సోషల్​మీడియాలో తెగ వైరల్​ అవుతున్నది. ఇంతకు ఆ మహిళకు హెలికాప్టర్​ ఎందుకు అవసరం పడింది. ఆమె నేరుగా రాష్ట్రపతికే ఎందుకు లేఖ రాసిందో? ఈ కథనంలో తెలుసుకుందాం..
మధ్యప్రదేశ్‌ రాష్ట్రం మాండ్‌సౌర్ జిల్లాలొరి బర్ఖేడా గ్రామంలో బసంతి బాయి అనే మహిళరైతు నివసిస్తున్నారు. ఆమెకు గ్రామంలో కొంత భూమి ఉంది. అయితే ఆ పొలానికి వెళ్లేందుకు బాట (మార్గం) లేదు. పొలానికి వెళ్లాలంటే కచ్చితంగా వేరే పొలాలను దాటుకుంటూ వెళ్లాల్సిందే. అయితే ఇతర పొలాల వాళ్లు ఆమెను రానివ్వడం లేదు.

ఈ సమస్యను పలుమార్లు స్థానిక రెవెన్యూ అధికారులకు ఫిర్యాదు చేశారు బసంతి బాయి. అయితే ఎవరూ పట్టించుకోవడం లేదు. దీంతో ఆమె నేరుగా రాష్ట్రపతికి ఓ లేఖ రాసింది. ఆ లేఖలో ఇలా ఉంది. ‘అయ్యా మాది బర్ఖేడా గ్రామం. నాకు ఈ గ్రామంలో పొలం ఉంది. కానీ పొలానికి వెళ్లడానికి మార్గం లేదు. ఇతరులకు చెందిన పొలాలను దాటుకుంటూ వెళ్లాలి. నన్ను పొలాల గుండా రానివ్వడం లేదు. మీరు దయతలిచి హెలికాప్టర్​ ఇప్పిస్తే నేను హెలికాప్టర్​లో నా పొలానికి వెళ్తా’ అంటూ ఆమె లేఖ రాసింది. ఈ లేఖ సోషల్​మీడియాలో తెగవైరల్​ అవుతోంది.

బసంతి బాయి తన సమస్య అధికారులకు చెప్పేందుకు స్థానికంగా ఉండే ఓ టైపిస్ట్​ సాయంతో ఈ లేఖ రాయించింది. ఈ లేఖ ప్రస్తుతం విపరీతంగా వైరల్​ కావడంతో స్థానిక ఎమ్మెల్యే యశ్​పాల్​ సింగ్​ సైతం స్పందించారు.
ఈ విషయంపై యశ్​పాల్ మాట్లాడుతూ.. ‘సదరు మహిళా రైతుకు నేను హెలికాప్టర్​ అయితే ఇప్పించలేను. కానీ కచ్చితంగా ఆమె సమస్యను పరిష్కరిస్తా’ అంటూ ఆయన పేర్కొన్నారు.