చంద్రబాబు కూడా నాటకాల రాయుడే

కొందరు నేతలకు సంబంధించిన విషయాలు పెద్దగా బయటకు రావు. వారిని ఒక కోణంలోనే చూస్తుంటాం కానీ.. వారి ‘లోపల’ విషయాలు బయటకు రావు. అలాంటి విషయమే ఒకటి తాజాగా బయటకు వచ్చింది. అయితే.. ఆ మాట కూడా సదరు నేత నోటి నుంచే రావటం గమనార్హం. తిరుపతిలో జరిగిన నంది నాటకోత్సవ అవార్డుల ప్రధానోత్సవానికి హాజరైన ఏపీ ముఖ్యమంత్రి చంద్రబాబు తనకు సంబంధించిన ఆసక్తికర విషయాన్ని చెప్పుకొచ్చారు.

టీడీపీ నేత.. చిత్తూరు ఎంపీ శివప్రసాద్.. తాను ఇద్దరం చదువుకునే రోజుల్లో ఇద్దరం కలిసి ఒక నాటకం వేశామన్న విషయాన్ని చంద్రబాబు వెల్లడించారు. చంద్రగిరి హైస్కూల్లో చదువుకునే సమయంలో ఈ ఘటన జరిగిందన్న ఆయన.. శివప్రసాద్ కళల పట్ల ఆసక్తితో సినిమా రంగానికి వెళ్లారని వ్యాఖ్యానించారు. చంద్రబాబు కూడా నాటకాల రాయుడేనన్న మాట.