బాబు టూర్ లో పెయిడ్ ఆర్టిస్టులు..సంచ‌ల‌న వీడియో లీక్‌

ఏపీ మాజీ ముఖ్య‌మంత్రి, తెలుగుదేశం పార్టీ అధ్య‌క్షుడు నారా చంద్ర‌బాబు నాయుడు అమరావ‌తి ప‌ర్య‌ట‌న ర‌చ్చర‌చ్చ‌గా మారిన సంగ‌తి తెలిసిందే. రాజధాని పర్యటనకు వెళ్లిన‌ చంద్రబాబు కాన్వాయ్‌ను రైతులు అడ్డుకునే ప్రయత్నం చేశారు. పర్యటించవద్దంటూ ఫ్లకార్డులు - ఫ్లెక్సీలతో నిరసన తెలిపారు. చంద్రబాబుకు వ్యతిరేకంగా నినాదాలు చేశారు. అయితే, మ‌రికొంద‌రు చంద్ర‌బాబుకు మ‌ద్ద‌తుగా చేరారు. బాబుకు అనుకూలంగా నినాదాలు చేశారు. దీంతో అక్కడ ఉద్రిక్త పరిస్థితి ఏర్పడింది. అయితే, ఈ టూర్ లో పెయిడ్ ఆర్టిస్టులు పాల్గొన్న‌ట్లు ప్ర‌చారం జ‌రుగుతోంది. ఓ వీడియో చంద్ర‌బాబు కామెంట్ల‌ను పేర్కొంటూ... సోష‌ల్ మీడియాలో చ‌ర్చ జ‌రుగుతోంది.

రాజ‌ధాని సీడ్ యాక్సిస్ రహదారిలో చంద్రబాబు కాన్వాయ్ వ‌ద్ద ప‌లువురు నిర‌స‌న తెలిపారు. అయితే, టీడీపీ శ్రేణులు రాజధాని రైతులు నిరసనలను అడ్డుకుంటూ చంద్రబాబుకు స్వాగతం పలికారు. వెంకటపాలెం వద్ద టీడీపీ - వైసీపీ కార్యకర్తల ఘర్షణతో తీవ్ర ఉద్రిక్తత ఏర్పడింది. వెంటనే రంగంలోకి దిగిన పోలీసులు.. రెండు పార్టీలకు చెందిన ఆందోళనకారుల్ని అదుపులోకి తీసుకున్నారు. అయితే, బాబు కోసం వ‌చ్చిన బ్యాచ్‌ లో...పెయిడ్ ఆర్టిస్టులు ఉన్నార‌ని అంటున్నారు. ఈ మేర‌కు వైర‌ల్ అయిన ఓ వీడియోలో...``పెయిడ్ ఆర్టిస్టులు వ‌చ్చారా? వ‌చ్చే ఉంటారు. వారిని పెట్టి ఉండ‌క‌పోతే...అక్క‌డికి ఎవ‌రు వ‌స్తారు? `` అంటూ ఓ తెలుగుదేశం పార్టీ నేత‌తో చంద్ర‌బాబు వ్యాఖ్యానించిన తీరు వైర‌ల్ అయింది.

కాగా, చంద్రబాబు పర్యటనను రైతులు పెద్ద ఎత్తున్నే వ్య‌తిరేకించారు. తమకు క్షమాపణ చెప్పిన తరువాతే రాజధానిలో అడుగు పెట్టాలని డిమాండ్ చేశారు. గ్రామ కంఠాల సమస్యను ఎందుకు పరిష్కరించలేదని ప్రశ్నించారు. రైతులు గ‌తంలో ఆందోళనలు వ్య‌క్తం చేసినా..ప‌రిష్క‌రించ‌లేద‌ని ఆరోపించారు. చంద్రబాబు వెళ్తున్న బస్సును అడ్డుకునేందుకు ప్రయత్నించారు. అయితే, పోలీసులుఅతి కష్టం మీద చంద్రబాబు కాన్వాయ్‌ కు రూట్‌ క్లియర్‌ చేశారు. ఇదిలాఉండ‌గా, కావాలనే గొడవలు సృష్టిస్తున్నారని టీడీపీ నేత‌లు ఆరోపించారు.