హీరోయిన్-వ్యాపారవేత్త పెళ్లి రచ్చకు శుభం కార్డు

సెలబ్రిటీలపై కొందరు చేసే ఆరోపణల్లో నిజం కంటే అబద్దాలే ఎక్కువ. అలాంటి ఉదంతమే తాజాగా కర్ణాటకలో చోటు చేసుకుంది. కన్నడ హీరోయిన మేఘనా రాజ్ తనను పెళ్లి చేసుకొని మోసం చేసిందంటూ తమిళనాడుకు చెందిన వ్యాపారవేత్త ఒకరు ఆరోపించటం.. చర్చగా మారింది. తనను పెళ్లి చేసుకొని మోసం చేసిందంటూ హీరోయిన్ పై బెంగళూరు పోలీస్ కమిషనర్ కు కొన్ని నెలల కింద ఫిర్యాదు చేయటం అప్పట్లో సంచలనంగా మారింది. ఈ వ్యవహారంపై పోలీసులు దృష్టి సారించారు.

హీరోయిన్ మేఘనా రాజ్ తో పెళ్లి అయిందంటూ వ్యాపారవేత్త జనార్దన్ చేస్తున్నవాదనలో ఎలాంటి పస లేదని.. అదంతా నిజం కాదన్న విషయాన్ని పోలీసులు తాజాగా తేల్చేశారు. హీరోయిన్ తో తన పెళ్లి జరిగిందని చెప్పుకుంటున్న వ్యాపారవేత్తను కర్ణాటక పోలీసులు పిలిపించి విచారించిన సమయంలో.. సదరు హీరోయిన్ ఇల్లు ఎక్కడ ఉంటుందో కూడా చెప్పకపోవటం గమనార్హం. ఉత్తినే ఆరోపణలు చేసినట్లుగా పోలీసులు తేల్చారు. హీరోయిన్ మేఘనారాజ్ తో జరిగిందని చెబుతున్న పెళ్లికి సంబంధించిన ఒక్క సాక్ష్యాన్ని కూడా చూపించలేదని బెంగళూరు పోలీస్ కమిషనర్ స్పష్టం చేశారు.

సదరు వ్యాపారవేత్త వ్యవహారం అంతా అబద్ధమని పోలీసులు తేల్చిన తర్వాత.. హీరోయిన్ తల్లి మాట్లాడుతూ.. తమకు జనార్దన్ అన్న వ్యక్తి ఎవరో కూడా తెలీదని.. తమను దెబ్బ తీయటానికి.. తన కూతురు కెరీర్ ఎదుగుదలను చూసి సహించలేకే ఇలాంటి వాటికి పాల్పడుతున్నట్లుగా ఆవేదన వ్యక్తం చేశారు. తమనెంతో ఇబ్బంది పెట్టిన వ్యాపారవేత్తపై హీరోయిన్ ఫ్యామిలీ చట్టపరమైన చర్యలు తీసుకునేందుకు రెఢీ అవుతోంది. నిజమే.. ఇలాంటి మోసగాళ్లపై చర్యలు తీసుకోవాల్సిన అవసరం ఎంతైనా ఉంది.