సైలెంట్ అయిన సీఎం రమేష్.. ఏంటి కథ?

సుజనా చౌదరి - సీఎం రమేష్.. చంద్రబాబుకు వారిద్దరూ రైట్ హ్యాండ్స్ అంటుంటారు. బాబు పార్టీకి ఆర్థికంగా అండదండలు అందించారని పేరుంది. అందుకే చంద్రబాబు సీఎం అయ్యాక వీరికి రాజ్యసభ ఎంపీల పదవులిచ్చి.. కాంట్రాక్టులిచ్చి.. అమరావతి భూములు ఇచ్చి సంతృప్తి పరిచాడన్నది వైసీపీ వర్గాల ఆరోపణ.

అయితే చంద్రబాబు ప్రోద్బలంతోనే బీజేపీలో చేరిన సుజనా చౌదరి - సీఎం రమేష్ ల వైఖరిలో స్పష్టమైన మార్పు ఇప్పుడు కనిపిస్తోంది. సుజనాచౌదరి బీజేపీ మొత్తం తనదే అన్నట్టుగా రాష్ట్రంలోని వైసీపీ సర్కారుపై బెదిరింపులకు దిగుతున్నారు. ‘అమరావతిని ఎలా మారుస్తావంటూ హెచ్చరిస్తున్నారు. బీజేపీ చూస్తూ ఊరుకోదు’ అంటూ ఘీంకరిస్తున్నారు.

అయితే మరో కీలకమైన నేత సీఎం రమేష్ మాత్రం బీజేపీ లో చేరాక సైలెంట్ అవ్వడం అందరినీ ఆశ్చర్యానికి గురిచేస్తోంది. ఫైర్ బ్రాండ్ గల నేత అమరావతిని మార్చి జగన్ మూడు రాజధానుల ప్రకటన చేసినా.. తన సొంత సీమకు హైకోర్టును ప్రసాదించినా ఉలుకూపలుకూ లేకపోవడం రాజకీయంగా హాట్ టాపిక్ గా మారింది..

దేనిమీదైనా సరే వేగంగా స్పందించే సీఎం రమేష్ మౌనం దాల్చడం ఇప్పుడు ఏపీలో చర్చనీయాంశంగా మారింది. అంతేకాదు ప్రజలకు అందుబాటులో లేకుండా.. రాజకీయాల్లోనూ యాక్టివ్ లేకుండా సీఎం రమేష్ ఎక్కడున్నాడు? ఏం చేస్తున్నాడన్నది అంతుచిక్కని విధంగా ఉంది.