అమరావతి లో పెయిడ్ ఆర్టిస్టులు.. ఫృథ్వీ సంచలన కామెంట్స్

ఏపీలో 3 రాజధానుల ప్రతిపాదన పై వైసీపీ నేతలంతా స్పందించారు. టీడీపీ నేతలను, చంద్రబాబుపై దుమ్మెత్తిపోస్తున్నారు. జగన్ కు సపోర్టుగా నిలబడుతున్నారు. అయితే ఇన్నాళ్లు స్పందించని వైసీపీ ప్రధాన కార్యదర్శి, ఎస్వీబీసీ చైర్మన్ ఫృథ్వీ తాజాగా 3 రాజధానుల పై సంచలన వ్యాఖ్యలు చేశారు.

ఏపీ అసెంబ్లీలో జగన్ మూడు రాజధానుల పై ప్రకటన చేసినప్పటి నుంచి అమరావతిలో రైతులు ఆగ్రహం వ్యక్తం చేస్తూ ఆందోళనలు చేస్తున్న సంగతి తెలిసిందే.. తాజాగా నిరాహార దీక్ష లో రైతులు కూర్చోవడం తో ఈ ఆందోళన మలుపు తిప్పినట్టైంది.

అయితే ఇప్పటి వరకూ వైసీపీ మంత్రులు, నేతలు చేసిన ప్రకటనతో అమరావతి రైతులు చిర్రెత్తి పోగా.. తాజాగా ఎస్వీబీసీ చైర్మన్ ఫృథ్వీ సంచలన కామెంట్ల తో మరింత కాకరేపారు.

ఫృథ్వీ మాట్లాడుతూ ‘ధర్నా లో పాల్గొన్న వారంతా రైతులు కాదు.. వారు జూనియర్ ఆర్టిస్టులు.. నాకు తెలిసిన పెయిడ్ ఆర్టిస్టులు వారు..మా 3 రాజధానుల నిర్ణయం తో దేవుడు కూడా సంతోషంగా ఉన్నాడు. డబ్బులు ఇస్తే వచ్చిన ఈ పెయిడ్ ఆర్టిస్టు ల నిరసనల లొల్లి పట్టించుకోనవసరం లేదు’ అంటూ సంచలన వ్యాఖ్యలు చేశారు. ఫృథ్వీ మాటలు ఇప్పుడు సోషల్ మీడియా లో వైరల్ అవుతున్నాయి. నెటిజన్లు కొందరు పాజిటివ్ గా, మరి కొందరు నెగెటివ్ గా స్పందిస్తున్నారు.