పిక్ టాక్: ఈమె నిర్మల కూతురు కాదు..

గడిచిన రెండు రోజుల నుంచి ఒక ఫొటో సోషల్ మీడియాలో వైరల్ గా మారింది. అదే పనిగా చక్కర్లు కొడుతోంది. తెలుగువారి కోడలు, దేశరక్షణ మంత్రి నిర్మలా సీతారామన్ ఒక యువ సైనిక అధికారిణితో కలిసి దిగిన ఆ ఫొటోపై పలు కామెంట్లు వినిపించాయి. ఆ ఫొటోలో ఉన్న అమ్మాయి నిర్మలా సీతారామన్ కూతురు అంటూ వైరల్ చేస్తున్నారు. కానీ నిజానికి ఆమె ఒక యువ సైనిక అధికారిని అని తేలింది.

ఆంధ్రప్రదేశ్ కు చెందిన రాజకీయ నాయకుడు పరకాల ప్రభాకర్ , అతడి భార్య రక్షణ మంత్రి నిర్మలా సీతారామన్ కు ‘వంగమాయి’అనే కూతురు ఉంది. వంగమాయి లండన్ స్కూల్ ఆఫ్ ఎకనామిక్స్ లో గ్రాడ్యుయేషన్ పూర్తి చేసింది. సైనిక దుస్తుల్లో ఉన్న యువతి నిర్మలా కూతురే అంటూ ప్రచారం జరిగింది.

నిర్మలతో ఫొటోలో ఉన్న సైనికాధికారి పేరు నిఖిత వీరయ్య. ఈమెది మంగళూరు. ఇటీవలే సైన్యంలో చేరిన యువ ఆధికారిణి.ఆర్మీ క్యాంపును సందర్శించిన రక్షణమంత్రితో నిఖిత ఇటీవలే ఫొటో దిగి సోషల్ మీడియాలో షేర్ చేసుకుంది. కానీ ఈమే నిర్మల కూతురు అంటూ ప్రచారం జరిగింది. వేలాదిమంది షేర్లు చేశారు. దీంతో చాలామంది మంత్రి నిర్మల కూతురే అని నమ్ముతున్నారు.

తాజాగా ఈమె నిర్మల కూతురు కాదని స్పష్టమైంది. నిర్మల కూతురు కాదని తేలడంతో ఇప్పటికైనా తప్పుడు షేర్లు ఆపాలని పలువురు కోరుతున్నారు.