గబ్బర్ సింగ్ ను రబ్బర్ సింగ్ గా మార్చిన కరోనా

కరోనా నేపథ్యంలో భారత్ 21 రోజుల పాటు లాక్ డౌన్ అయిన సంగతి తెలిసిందే. లాక్ డౌన్ పుణ్యమా అంటూ ఎవరు బయటకు వెళ్లలేని పరిస్థితి. ఓ వైపు కరోనా తీవ్రత గురించి సోషల్ మీడియాలో ప్రచారం జోరుగా జరుగుతుంటే....మరోవైపు కరోనా దెబ్బకు మగమహారాజులంతా ఇళ్లలో పడుతున్న పాట్ల వీడియోలపై సెటైర్లు పేలుతున్నాయి. మామూలు టైంలో కుదరుగా ఉండని పురుష పుంగవుల ముందరి కాళ్లకు కరోనా బంధం వేసిందని టిక్ టాక్ వీడియోలు వైరల్ అవుతున్నాయి. కరోనా దెబ్బకు తమ భార్యల చేతుల్లో బలవుతున్నామని...ఇంటి పని, వంటపని చేయిస్తూ....తమపై భార్యలంతా రివేంజ్ తీర్చుకుంటున్నారని మూగోళ్లు...కాదు కాదు మగోళ్లు గోడు వెళ్లబోసుకుంటున్నారు. కరోనా కన్నా కట్టుకున్న భార్యలే డేంజర్ అంటూ మెమేలు, జోకులు పేలుస్తున్నారు. ఇక, ఈ కరోనా కష్టాలు కేవలం సామాన్యులకే కాదు...సెలబ్రిటీలకు తప్పడం లేదు. మైదానంలో ప్రత్యర్థి బౌలర్లకు వణుకు పుట్టించే టీమిండియా ఓపెనర్ శిఖర్ ధవన్...తన భార్య ఆయేషా పేరు చెబితేనే గజగజా వణికిపోతున్నాడట. మేటి బౌలర్ల యార్కర్లను సైతం అవలీలగా ఎదుర్కొన్న గబ్బర్ సింగ్...క్వారంటైన్ లో హోమ్ మినిస్టర్ చేతిలో హిట్ వికెట్ అయ్యాడట.

కరోనా దెబ్బకు అన్ని రంగాలతో పాటు క్రీడాలోకం పూర్తి‌గా స్థంభించింది. ఐపీఎల్ సహా అన్ని మ్యాచ్ లు రద్దవడంతో టీమిండియా క్రికెటర్లంతా ఇంటిపట్టునే ఉంటున్నారు. ఎప్పుడూ టూర్లంటూ ఊళ్లు పట్టుకు తిరిగే తమ పతి దేవుళ్లు ఇంట్లో ప్రత్యక్షమయ్యే సరికి వారి భార్యలు ఎగిరి గంతేస్తున్నారు. కొందరేమో తమ తమ భర్తలతో ఎక్సర్ సైజులు, యోగాలు అంటూ టైం స్పెండ్ చేస్తోంటే...మరి కొందరేమో తమ భర్తలతో వెట్టి చాకిరీ చేయిస్తున్నారట. భార్యాబాధితుడైన టీమిండియా ఓపెనర్ శిఖర్ ధవన్...తన దయనీయ పరిస్థితి ఎలా ఉందో చెబుతూ ఓ వీడియోను ట్విటర్ ఖాతాలో పోస్ట్ చేశాడు. తన భార్య ఆయేషా ఆర్డర్ వేయడంతో....గ్రౌండ్ లో బౌలర్లను ఉతికి `ఆరే`సే గబ్బర్...ఇంట్లో బట్టలు ఉతికి ఆరేస్తున్నాడు. ఓ వైపు ధవన్‌ తో బట్టలు ఉతికిస్తున్న ఆయేషా...ఎంచక్కా మేకప్ వేసుకుంటూ కనిపించింది. అంతేకాదు, ఆయేషా కర్రపట్టుకొని మరీ పని చేయిస్తుంటే....గబ్బర్ కట్టప్పలా మారిపోయాడు.

పాక్ బౌలర్లను ఓ ఆటాడుకున్న ధవన్ తో పాకీపని కూడా చేయించింది ఆయేషా. ప్రస్తుతం ఈ సరదా వీడియో సోషల్ మీడియాలో వైరల్ అయింది. భార్యాబాధితుల సంఘానికి వెల్ కం అంటూ గబ్బర్ పై నెటిజన్లు సెటైర్లు వేస్తున్నారు. కరోనా దెబ్బకు భార్యాబాధితులు పెరిగిపోయారని కొందరు....దాదాపుగా అందరు భర్తల పరిస్థితి ఇంతే ఉందని మరికొందరు సరదాగా కామెంట్స్ చేస్తున్నారు. ఇక, ధవన్ పరిస్థితి చూసిన భారత టెన్నిస్‌ స్టార్‌ సైనా నెహ్వాల్‌ కూడా నవ్వుతున్న ఎమోజీలను కామెంట్‌ చేసింది. ఎంతైనా మెన్ విల్ బి మెన్...వుమెన్ విల్ బి వుమెన్ అంటూ నెటిజన్లు ధవన్ కు సపోర్ట్ చేస్తున్నారు. ఎంతవారలైనా...భార్యాబాధితులే కదా...అంటూ ఫన్నీగా మెమేలు పోస్ట్ చేస్తున్నారు. ఏదేమైనా గ్రౌండ్లో గబ్బర్ సింగ్ ...ఇంట్లో రబ్బర్ సింగ్ గా మారిపోయాంటూ కామెంట్స్ చేస్తున్నారు.