కోడెల కూతురు అరెస్టుపై కోర్టు ఆదేశాలు!

తెలుగుదేశం పార్టీ అధికారం కోల్పోయిన తర్వాత కోడెల కుటుంబం పై పలు ఫిర్యాదులు చోటు చేసుకున్నాయి. కోడెల కూతురు, కొడుకు బాధితులమంటూ అనేక మంది పోలీసులను ఆశ్రయించారు. తెలుగుదేశం పార్టీ అధికారంలో ఉండగా.. కోడెల తనయ - తనయుడు తమను బెదిరించి వసూళ్లకు పాల్పడినట్టుగా అనేక మంది ఆరోపించారు.

వరస పెట్టి వాళ్లంతా పోలిస్ స్టేషన్ చేరారు.ఫిర్యాదులు చేశారు. ఆ ఫిర్యాదులతో మాజీ స్పీకర్ కోడెల శివప్రసాద్ రావు మీద కూడా కేసు ఒకటి నమోదు అయ్యింది. మరోవైపు కొంతమంది దళిత బాధితులు కూడా వారిపై ఫిర్యాదులు చేశారు. దీంతో అట్రాసిటీ కేసులు నమోదు అయ్యాయి. ఆ వ్యవహారంలో కోడెల కూతురును అరెస్టు చేయవచ్చని వార్తలు వచ్చాయి.

ఈ నేపథ్యంలో కోడెల శివప్రసాద్ తనయ విజయలక్ష్మి ముందస్తు బెయిల్ తీసుకున్నారు. కోర్టును ఆశ్రయించి ఆమె అరెస్టు నుంచి తాత్కాలిక మినహాయింపును పొందారు. అట్రాసిటీ కేసులో కోడెల కూతురును అరెస్టు చేయవద్దని కోర్టు ఆదేశాలు జారీ చేసింది. అయితే ఈ కేసు విచారణ కొనసాగుతుందని కోర్టు స్పష్టం చేసింది. కోడెల కూతురుకు అయితే తాత్కాలిక ఉపశమనం దక్కిందని పరిశీలకులు అంటున్నారు.