తెలంగాణలో కరోనా తగ్గుముఖం.. నిజమేనా!

‘తెలంగాణ ప్రభుత్వం కరోనా రోగులను గాలికి వదిలేసింది. టెస్టులు చేయడం లేదు. రోగులను పట్టించుకోవడం లేదు. కార్పొరేట్​ ఆస్పత్రులు పేదలను పీల్చిపిప్పిచేస్తున్నాయి. ఓ వైపు ఉపాధి కోల్పోయి.. మరోవైపు ప్రభుత్వం పట్టించుకోక ప్రజలు ఉక్కిరిబిక్కిరవుతున్నారు’ ఇవీ తెలంగాణ ప్రభుత్వంపై గత కొంతకాలంగా ప్రతిపక్షాల నుంచి వినిపిస్తున్న ఆరోపణలు. అయితే ఈ ఆరోపణలను రాష్ట్ర ప్రభుత్వం ఏమాత్రం పట్టించుకోలేదు. తమపని తాము చేసుకుంటూ పోతోంది. అయితే ఈ మధ్య కాలంలో రాష్ట్ర ప్రభుత్వం విడుదల చేస్తున్న హెల్త్​ బులిటిన్​ గమనిస్తే మాత్రం ఇక్కడ కరోనా తగ్గుముఖం పట్టినట్టే అనిపిస్తున్నది.

దీనిపై తాజాగా ప్రజారోగ్య సంచాలకుడు డాక్టర్​ శ్రీనివాసరావు స్పందించారు. తెలంగాణలో నిజంగానే కరోనా తగ్గుముఖం పట్టిందా? లేదా విపక్షాలు చెప్పినట్టు ప్రభుత్వం చెప్పేవన్ని తప్పుడు లెక్కలా? అయన మాటల్లోనే.. తెలంగాణలో కరోనా వ్యాధి అదుపులోనే ఉన్నది. ఈ వ్యాధి బారినపడ్డవారు సుమారు 81.54 శాతం మంది కోలుకుంటున్నారు. ప్రతి రోజు ఎంత మందికి కరోనా వస్తున్నదో.. అదే సంఖ్యలో కోలుకుంటున్నవారి సంఖ్య ఉన్నది. అయితే బాధితుల్లో 78 శాతం మంది ఇంట్లో ఉండి చికిత్స తీసుకుంటున్నవారే. వారు ఇంట్లో హోమ్​ ఐసోలేషన్ ​లో ఉంటున్నారు. ఆ మేరకు వైద్య సిబ్బంది అవగాహన కల్పిస్తున్నారు. ఐసీఎంఆర్​ మార్గ దర్శకాలు అనుసరించే వైద్య సిబ్బంది టెస్టులు చేస్తున్నారు. వివరాలను ఆన్​లైన్​ లో పొందుపరుస్తున్నారు’ అని ఆయన చెప్పారు.

లక్షణాలు లేనివారే ఎక్కువ..
తెలంగాణ లో కరోనా లక్షణాలు లేకపోయిన కరోనా సోకుతున్నవారు ఎక్కువ సంఖ్యలో ఉంటున్నారు. వీళ్లలో దాదాపు 95 శాతం మందికి ఇంట్లో ఉంచే చికిత్స అందిస్తున్నాం. వీరికి హితం యాప్​ ద్వారా వైద్య సిబ్బంది సేవలను అందిస్తున్నది. ఇలా లక్షణాలు లేకుండా కరోనా వచ్చినవారికి 10 రోజుల పాటు ఎటువంటి అనారోగ్య సమస్యలు రాకపోతే వారిని ఇక నెగిటివ్​ గా నిర్ధారిస్తాం. వారి పేరు నెగిటివ్​ లిస్ట్​ లోకి వెళ్లి పోతుంది. వీరికి మళ్లీ పరీక్షలు నిర్వహించబోము. ఇది ఐసీఎంఆర్​ నిబంధన. ఒకవేళ అందులో ఎవరికైనా లక్షణాలు కనిపిస్తే వారికి చికిత్స అందిస్తాం.