మొన్న గుండు.. ఇప్పుడు ఏకంగా తల?

ఒక పోస్టర్ భారత క్రికెట్ అభిమానుల రక్తం మరిగిపోయేలా చేస్తోంది. అభిమానం ఉండాలే కానీ.. అది హద్దులు దాటకూడదు. హద్దులు దాటటమే కాదు.. పిచ్చి పరాకాష్టకు చేరుకున్న చందంగా తాజాగా బంగ్లాదేశ్ క్రికెట్ అభిమాని తయారు చేసిన ఒక పోస్టర్ భారతీయుల గుండె మండిపోయేలా చేస్తోంది. ఆ మధ్యన టీమిండియా క్రికెటర్ల గుండు గీసినట్లుగా ఒక ఫోటోను రూపొందించిన బంగ్లాదేశ్ ఫ్యాన్స్ తాజాగా చేసిన ఒక గ్రాఫిక్ ఫోటో కొత్త హీట్ పుట్టేలా చేసింది.

టీమిండియా కెప్టెన్ ధోనీ తలను పట్టుకొని బంగ్లాదేశ్ ఫాస్ట్ బౌలర్ తస్కిన్ అహ్మద్ విజయనినాదం చేస్తున్నట్లుగా పోస్టర్ తయారు చేసి.. దాన్న సోషల్ మీడియాలో పెట్టటంతో.. అదిప్పుడు భారతీయుల గుండెను మండిస్తోంది. సోషల్ మీడియాలో హడావుడి చేస్తున్న ఈ పోస్టర్ పై సర్వత్రా ఆగ్రహం వ్యక్తమవుతోంది.

ఇలాంటి చెత్తపనులు బంగ్లాదేశ్ క్రికెట్ అభిమానులకు మామూలే. గతంలోనే ఇలాంటి పిచ్చనే ప్రదర్శించి వారు.. తాజాగా ధోనీ తలను తన చేత్తో పట్టుకొని.. రణ నినాదం చేస్తున్నట్లు రూపొందించిన ఫోటో నేపథ్యంలో.. ఆసియాకప్ ఫైనల్ లో బంగ్లాదేశ్ జట్టును ఉతికి ఆరేయటమే కాదు.. దారుణ ఓటమిని రుచి చూపించాలంటూ మండిపడుతున్నారు. ఆసియా కప్ ఫైనల్ లో భారత్.. బంగ్లాదేశ్ తలపడుతున్న నేపథ్యంలో తాజా పోస్టర్ టీమిండియా అభిమానుల బీపీని ఓ రేంజ్ లో పెంచేలా చేస్తుందనటంలో ఎలాంటి సందేహం లేదు. రెండు దేశాల మధ్య ఉద్రిక్తతల్ని పెంచే ఇలాంటి పోస్టర్లపై బంగ్లాదేశ ప్రభుత్వం రియాక్ట్ అయి.. చర్యలు తీసుకోవాల్సిన అవసరం ఉందన్న విషయాన్ని మర్చిపోకూడదు.