కోహ్లీ బర్త్ డే వేడుకల్లో అంతా తానే వ్యవహరించిన ధోనీ !

టీ20 ప్రపంచ కప్ 2021లో స్కాట్లాండ్‌ పై విజయం తర్వాత, టీమిండియా ఆటగాళ్లు, సహాయక సిబ్బంది కలిసి కెప్టెన్ విరాట్ కోహ్లీ పుట్టినరోజును డ్రెస్సింగ్ రూమ్‌ లో అట్టహాసంగా నిర్వహించారు. విరాట్ కోహ్లీ శుక్రవారం తన 33వ పుట్టినరోజును చేసుకున్నాడు. స్కాట్లాండ్‌ పై అద్భుతమైన విజయంతో కోహ్లీ టీం ఖచ్చితమైన బహుమతిని అందుకున్నాడు. విరాట్ కోహ్లీ బర్త్ డే వేడుకలను మాజీ సారథి, టీ20 ప్రపంచకప్ మెంటార్ మహేంద్రసింగ్ ధోనీ అంతా తానే అయి నిర్వహించాడు.

ఇండియన్ డ్రెస్సింగ్ రూములో జరిగిన ఈ వేడుకలకు ధోనీ దగ్గరుండి ఏర్పాట్లు చేశాడు. కేండిల్స్ వెలిగించాడు. కేకును ఏర్పాటు చేసి కోహ్లీతో దగ్గరుండి కట్ చేయించాడు. సహచరులతో కలిసి బర్త్ డే విషెస్ చెప్పాడు. కోహ్లీ తొలుత ధోనీకే కేక్ తినిపించాడు. ఇందుకు సంబంధించిన వీడియోను బీసీసీఐ తన ట్విట్టర్ ఖాతాలో పోస్ట్ చేసింది. స్కాట్లాండ్‌ పై అద్భుత విజయం అనంతరం ఈ వేడుకలు జరిగాయి. సహచరులు సూర్యకుమార్ యాదవ్, వరుణ్ చక్రవర్తి పోస్టు చేసిన ఇన్‌స్టాగ్రామ్ వీడియల్లో కోహ్లీ ముఖంపై కేక్ పూసివున్నట్టు కనిపించింది.

స్కాట్లాండ్‌పై భారీ విజయంతో భారత్ నెట్ రన్ రేట్ గ్రూప్ 2లో అత్యుత్తమంగా నిలిచింది. భారత్ 4 మ్యాచ్‌లలో 2 విజయాలతో 4 పాయింట్లను కలిగి ఉంది. నెట్ రన్ రేట్ (+1.619)లో పాకిస్థాన్, ఆఫ్ఘనిస్తాన్, న్యూజిలాండ్ కంటే మెరుగ్గా ఉంది. పాయింట్ల పట్టికలో టీమిండియా మూడో స్థానానికి చేరుకుంది. ప్రస్తుతం టీమ్ ఇండియా నమీబియాపై భారీ విజయం సాధించాలి. అంతకుముందు ఆఫ్ఘనిస్తాన్ వర్సెస్ న్యూజిలాండ్‌ మ్యాచులో ఆఫ్ఘన్ గెలవాలని ఆశించాలి. అప్పుడే సెమీఫైనల్‌ కు చేరే అవకాశం ఉంటుంది.