తప్ప తాగిన స్నేహితుడి కారు ఎక్కి ప్రాణాలు పోగొట్టుకున్న యూ ట్యూబర్

హోలీ పండుగ సాయంత్రం వేళ.. హైదరాబాద్ లో చోటు చేసుకున్న ఒక రోడ్డు ప్రమాదం చాలామందికి షాకిచ్చింది. మితిమీరిన వేగంతో దూసుకెళుతున్న కారు అదుపు తప్పి.. పేవ్ మెంట్ మీద మొక్కలకు నీళ్లు పోస్తున్న మధ్య వయస్కురాలి ప్రాణాల్ని తీయటమే కాదు.. కారు బోల్తా పడిన వైనంలో కారులో ప్రయాణిస్తున్న ఇద్దరు ప్రాణాలు కోల్పోవటం సంచలనంగా మారింది.

సీటు బెల్టు పెట్టుకోని కారణంగా.. ఓవర్ స్పీడ్ తో పట్టు తప్పి బోల్తా పడిన వేళ.. పగిలిన అద్దాల ఖాళీలో నుంచి ఒక యూట్యూబర్ ప్రాణాలు తీసుకున్న వైనం ఒక పట్టాన జీర్ణించుకోలేని పరిస్థితి. కారు ఢీ కొన్న వేగానికి పగిలిన అద్దాల్లో నుంచి బయటకు విసిరేసినట్లుగా రోడ్డు మీద పడిన డాలీ డిక్రూజ్ అలియాస్ గాయత్రి తీవ్రమైన దెబ్బలు తాకి ఆసుపత్రికి తరలించే లోపే ప్రాణాలు పోయిన దుస్థితి.

గచ్చిబౌలిలోని ఎల్లా హోటల్ వద్ద చోటు చేసుకున్న ఈ దారుణ ప్రమాదానికి సంబంధించి కాస్త ఆలస్యంగా పలు విషయాలు బయటకు వచ్చాయి. ప్రమాదంలో ప్రాణాలు కోల్పోయిన గాయత్రి అలియాస్ డాలీ మరణం చాలామంది జీర్ణించుకోలేని పరిస్థితి.

అసలేం జరిగిందన్న విషయాన్ని ఆరా తీసిన పోలీసులకు షాకింగ్ నిజాలు బయటకు వచ్చినట్లుగా చెప్పాలి. డాలీ విషయానికి వస్తే ఆమె యూట్యూబర్ షణ్ముక్ జస్వంత్ తో పాటు పలు షార్ట్ ఫిలిమ్స్ లో చేశారు. హోలీ రోజున డాలీతో పాటు ఆమె ఐదుగురు స్నేహితులు కలిసి పార్టీ చేసుకోవాలని డిసైడ్ అయ్యారు.

పార్టీలో భాగంగా కబుర్లు అయ్యాక.. ఓడ్కాను కొబ్బరి బొండాల్లో నింపేశారు. వాటిని తాగేసిన తర్వాత.. ఒక పబ్ కు వెళ్లారు. అక్కడి నుంచి బయటకు వచ్చిన వారు.. ఎవరిళ్లకు వారు బయలుదేరారు. ఈ సందర్భంగా డాలీ.. స్నేహితుడైన రోహిత్ తో కలిసి బయలుదేరింది. దీనికి కారణం వీరిద్దరి ఇళ్లు కాస్త దగ్గరనే. దీంతో.. ఆమె కారు ఎక్కేసింది.

అయితే.. మిగిలిన స్నేహితులు ఆమెను వార్న్ చేశారు. అంతేకాదు పుల్ తాగేసి ఉన్న రోహిత్ సైతం కారును డ్రైవ్ చేయకుండా వేరే కారులో వెళ్లాలని ఒత్తిడి చేశారు. అయినప్పటికీ తనకేం కాలేదన్న రోహిత్.. స్నేహితుల మాటను వినని అతడు.. తనకు ఇబ్బంది లేదంటూ కారును నడపసాగాడు. ఫుల్ గా తాగేసిన అతను అదుపు తప్పిన వేగంతో పేవ్ మెంట్ను ఢీ కొన్న రోహిత్ తన ప్రాణాల్ని మాత్రమే కాదు.. తనను నమ్మి కారు ఎక్కిన స్నేహితురాలి ప్రాణాల్ని కూడా రోహిత్ బలి ఇచ్చారని చెబుతున్నారు.