ఆ దేశాధ్య‌క్షుడి వైఫ్ ను అలా అనేసిన ట్రంప్‌

వివాదాల‌తో చెట్టాప‌ట్టాలేసుకొని తిరిగేసే అమెరికా అధ్య‌క్షుడు డొనాల్డ్ ట్రంప్ తాజాగా మ‌రో వివాదంలో చిక్కుకున్నారు. ట్రంప్ కాలు క‌దిపినా.. నోరు విప్పినా సంచ‌ల‌న‌మే. త‌న నోటి దూల‌తో ఇప్ప‌టికే ప‌లువురి ఆగ్ర‌హానికి గురైనా.. విమ‌ర్శ‌ల్లో చిక్కుకున్నా త‌న తీరు మార‌ద‌న్న విష‌యాన్ని ఇప్ప‌టికే స్ప‌ష్టం చేసిన సంగ‌తి తెలిసిందే. తాజాగా ఒక దేశాధ్య‌క్షుడి వైఫ్ ను ట్రంప్ అన్న మాట‌లు విన్న వారి మ‌తి పోతోంది
.
పొగ‌డ్త పేరుతో ట్రంప్ వెకిలిగా వ్య‌వ‌హ‌రించార‌న్న విమ‌ర్శ వినిపిస్తోంది. ఒక దేశాధ్య‌క్షుడి వైఫ్ ను ట్రంప్ అన్న మాట‌తో ప‌లువురికి నోట మాట రాని ప‌రిస్థితి. ఫ్రాన్స్ ప‌ర్య‌ట‌న సంద‌ర్భంగా చోటు చేసుకున్న ఈ ఉదంతానికి సంబంధించిన వీడియో ఇప్పుడు వైర‌ల్ గా మారింది. ఫ్రాన్స్ దేశాధ్య‌క్షుడు ఇమ్మాన్యుయ‌ల్ మెక్రాన్‌.. ఆయ‌న భార్య బ్రిగెట్ ముచ్చ‌ట తెలిసిందే. త‌న‌కంటే పాతికేళ్ల పెద్ద‌దైన మ‌హిళ‌ను పెళ్లి చేసుకోవ‌టం ద్వారా ఇప్ప‌టికే ఫ్రాన్స్ అధ్య‌క్షుడు వార్త‌ల్లో న‌లిగారు. త‌న స్కూల్ టీచ‌ర్ ను స్టూడెంట్ గా ఉన్నప్పుడే మ‌న‌సు ప‌డి.. ఇద్ద‌రు పిల్ల‌ల త‌ల్లైన ఆమెను పెళ్లాడిన వైనం అంద‌రికి తెలిసిందే.

వీరిద్ద‌రి అనుబంధంపై చాలానే వార్త‌లు వ‌స్తుంటాయి. ఇదిలా ఉంటే.. తాజాగా వారిని క‌లిశారు ట్రంప్ దంప‌తులు. ప్ర‌తి ఒక్క‌రిని ఏదో ర‌కంగా కెలికే ట్రంప్‌.. తాజా ఎపిసోడ్ లోనూ త‌న బుద్ధిని పోనిచ్చుకోలేదు. పారిస్ లోని లెస్ ఇన్ వాలిడ్స్ లోని మ్యూజియంను సంద‌ర్శించిన అనంత‌రం.. ట్రంప్ దంప‌తుల‌కు వీడ్కోలు ప‌లికే సంద‌ర్భంలో దేశాధ్య‌క్షుడి వైఫ్ బ్రిగెట్ ను ఉద్దేశించి ట్రంప్‌.. ఆమె అందాన్ని పొగిడేశారు. ఈ వ‌య‌సులో ఇంత అంద‌మా అన‌టం వ‌ర‌కూ ఆప‌కుండా.. మీ శ‌రీర సౌష్ఠ‌వం బాగుందంటూ వ్యాఖ్య‌లు చేయ‌టంపై పెద్ద ఎత్తున విమ‌ర్శ‌లు వెల్లువెత్తుతున్నాయి. నోటి దూల‌కు ప‌రాకాష్ఠ లాంటి ఈ త‌ర‌హా ఉదంతాలు రానున్న రోజుల్లో మరెన్ని చోటు చేసుకోనున్నాయో?