కరోనా బంద్: మందుబాబులకు నరకం

కరోనాతో లాక్ డౌన్ ఎవరికి ఏం కష్టాలు తెచ్చిందో కానీ మందు బాబులు,మద్యానికి బానిసైన వారు మాత్రం చుక్కలేక చచ్చిపోతున్నారు. ఏకంగా వైన్స్ షాపులనే లూటీ చేస్తున్న పరిస్థితి తెలంగాణలో చూస్తున్నాం.

కరోనా ఎఫెక్ట్ తో తెలంగాణ - ఏపీలో మద్యం షాపులను ప్రభుత్వాలు బంద్ చేశాయి. దీంతో రోజూ మద్యం తాగితే కానీ పూట గడవని మందుబాబులు ఆగమాగం అయిపోతున్నారు. ఇక వీకెండ్ లో పార్టీలు చేసుకునే వారు సైతం చుక్కలేక పిచ్చెక్కిపోతున్నారు. మద్యానికి బానిస అయిన వారైతే కల్తీకల్లు తాగి పిచ్చెక్కిపోతున్న పరిస్థితి కనిపిస్తోంది.

కేవలం 24గంటలే జనతాకర్ఫ్యూ అని ఎవరూ మద్యాన్ని కొని నిల్వ చేయలేదు. అదే ఇప్పుడు మందుబాబుల కొంప ముచింది. పూర్తి బంద్ తో వారు నరకం అనుభవిస్తున్నారు.

లాక్ డౌన్ తో మద్యం బానిసలు వింతగా ప్రవర్తిస్తున్నారు. కొందరికి పిచ్చెక్కిపోతోంది. ఎంతకైనా మందు కొనడానికి తెగిస్తున్నారు. ఈ పరిణామం శాంతి భద్రతలకు ముప్పుగా పరిగణిస్తోంది.

ఇటీవలే తెలంగాణలో వైన్స్ లూటీలు మొదలయ్యాయి. తమకు భద్రత కల్పించాలని వైన్స్ యజమానులు పోలీసులకు ఫిర్యాదు చేశారు.

తాజాగా హైదరాబాద్ లో ఒక మందుబాబు వైన్స్ షాపులోకి ప్రవేశించడానికి తాళం పగులకొడుతున్న వీడియో వైరల్ అయ్యింది. మరికొన్ని చోట్ల వైన్స్ లూటీ ప్రయత్నాలు వీడియోలు వెలుగుచూశాయి. దీంతో ఇలాగే కొనసాగితే వైన్స్ లో సరుకు దోపిడీ కావడం ఖాయంగా కనిపిస్తోంది.

తెలంగాణలో వైన్స్ తెరుస్తున్నారనే ప్రచారం నేపథ్యంలో మందుబాబులంతా వైన్స్ ఎదుట క్యూ కట్టారు. కానీ అదేం లేదు అని తెలియడంతో ఇప్పుడు వైన్స్ లూటీకి ప్రయత్నిస్తున్నారు.